ەلباسى ن.نازاربايەۆ قىتايلىق قاتەرگە قاتىستى ءوز پىكىرىن ءبىلدىردى، – دەپ حابارلايدى Qamshy.kz اقپارات اگەنتتىگى.

"مەن "جۇڭگو ءبىزدى جاۋلاپ جاتىر" دەگەن سياقتى اڭگىمەلەردى ءجيى ەستيتىن بولدىم. كىمدى جاۋلاپ جاتىر؟ قالاي جاۋلاپ جاتىر؟ قازاقستاننىڭ جەرىن بىرەۋ ۆاگونعا تيەپ، الىپ كەتە مە؟"، – دەدى نازاربايەۆ "حابار" ارناسىنا بەرگەن سۇحباتىندا.

وسى ورايدا تۇڭعىش پرەزيدەنت جۇڭگو كاسىپورىندارىن سالۋ بويىنشا قانداي كەلىسىمنىڭ بولعانىن ايتىپ بەردى.

"جۇڭگو باسشىلىعىمەن ناقتى كەلىسىم بار. ءبىز بىرلەسكەن كاسىپورىن سالعاندا ۇكىمەتتەر ناقتى قانشا ماماننىڭ كەلەتىنىن انىقتاپ، كەلىسىممەن بەكىتەدى. نىساننىڭ قۇرىلىسى اياقتالعاننان كەيىن ءبارى كەتۋى كەرەك. كەزىندە حۋ سزينتاو دا كەتكىسى كەلمەسە بىزگە ايتىڭدار دەگەن. ءبارىن الىپ كەتەمىز دەدى. سوندىقتان فانتومدى ۇرەيدى تاراتۋدىڭ قاجەتى جوق. ەسكى كاسىپورىنداردى ەشكىم كوشىرىپ جاتقان جوق. ءبىز جەتەكشى كاسىپورىنداردى، قازاقستان ەكونوميكاسىنا قاجەتتى نىسانداردى عانا تاڭدايمىز"، – دەپ اتاپ كورسەتتى نازاربايەۆ.

قازاقستاننىڭ تۇڭعىش پرەزيدەنتى ايتۋىنشا، قازىرگى كەزدە قىتايدا قاراجات كوپ. ونى ءبارى العىسى كەلەدى.

"ال ولاردىڭ بىزگە دەگەن قارىم-قاتىناسى جاقسى. جالپى، مەن قىتايدىڭ بارلىق باسشىسىمەن جاقسى قارىم-قاتىناستا بولدىم. ونى قازىرگى ءتوراعا سي سزينپين دە راستاپ وتىر. ءبىز وسىنى پايدالانۋىمىز قاجەت. "جىبەك جولى" جوباسىن قولدادىق. سەبەبى وسى جوبا ءبىز ءۇشىن ءتيىمدى. ماسەلەن، ءقازىردىڭ وزىندە قازاقستان كونتەينەرلىك تاسىمالدىڭ ارقاسىندا ءبىراز پايدا تاۋىپ جاتىر. وسى ترانزيتپەن جىل سايىن 5 ميلليارد دوللار تاباتىن بولامىز"، –  دەيدى نازاربايەۆ.