اتىراۋ وبلىستىق سىبايلاس جەمقورلىققا قارسى اگەنتتىك وكىلدەرىنىڭ ستاتيستيكاسىنا سۇيەنسەك، اتىراۋ وبلىستىق پەريناتالدىق ورتالىعىندا سوڭعى ەكى ايدا ەلۋگە جۋىق شاقالاق شەتىنەپ كەتكەندىگى بەلگىلى بولدى. وسىعان بايلانىستى بالا ءولىمى ءورشىپ تۇرعان ورتالىقتىڭ بوسانۋ بولىمشەسى ۋاقىتشا جابىلاتىندىعىن اتىراۋ وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى مالىمدەدى.
«پەريناتالدىق ورتالىقتىڭ جەلدەتكىش جۇيەسى سوڭعى ءبىر جارىم جىلدان بەرى جۇمىس ىستەمەگەن. سونىڭ سالدارىنان اۋادا شاڭ مەن ينفەكسيا جينالعان. اقىلداسا كەلە، وسى جاعدايلار ورىن العان بوساندىرۋ بولىمشەسىن ۋاقىتشا جابۋ تۋرالى كەلىسىمگە كەلدىك. بۇل پەريناتالدىق ورتالىق تۇگەل جابىلادى دەگەن ءسوز ەمەس”، – دەدى اتىراۋ وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ باستىعى نىعمەدجان ساپاروۆ.
اتى شۋلى پەرزەنتحاناداعى توسەك جاپقىش پەن جايالىقتار ارنايى ورىندا ەمەس، اۋلادا جۋىلىپ كەپتىرىلگەن. ءقازىر ماماندار ول جەردەن سىناما الىپ تەكسەرۋگە كىرىستى. ەڭ سوراقىسى، دارىگەرلەردىڭ ماس كۇيىندە وتا جاساپ، سابيلەرگە زاقىم كەلتىرگەنى انىقتالعان. وسى جايتتاردىڭ ءبارى بالا مەن انا ءولىمىنىڭ كوبەيۋىنە اسەر ەتكەنى بەلگىلى بولدى.
سەبەبى، بيىل 45 مىڭ ءسابي دۇنيەگە كەلسە، ونىڭ 442ء-سى ءولى تۋعان. 432ء-سى جارىق دۇنيەنى كورە سالىپ شەتىنەگەن. ال بۇل بىلىقتاردىڭ اشكەرەلەنۋىنە سەبەپكەر بولعان ءسابي قازاسىنا قاتىستى دەرەكتى جەمقورلىقپەن كۇرەسكەرلەر ويدا جوقتا انىقتاعان. جەمقورلىققا قاتىستى كۇدىككە ىلىنگەن قۋانىش نىسانبايەۆتىڭ تەلەفونىن تىڭداۋ كەزىندە، بالانىڭ كوزىن جويۋ تۋرالى بۇيرىعىن ەستيدى.
«ءبىز اڭگىمەنى ەستىگەن بويدا ءسابيدى قۇتقارىپ قالۋ ءۇشىن شۇعىل جەتتىك، ءبىراق ۇلگەرمەدىك. پەريناتالدىق ورتالىق قىزمەتكەرلەرى ۇزاق ۋاقىت بويى ەسىكتى اشپادى. ال قۋانىش نىسانبايەۆتى ساعاتتاپ ىزدەپ، قالاداعى ساۋنالاردىڭ بىرىنەن ۇستادىق. تەرگەۋ جۇمىستارىنان كەيىن سابيلەردىڭ جاپپاي ءولىمىنىڭ ناقتى سەبەبى بەلگىلى بولادى دەپ وتىرمىز”، – دەدى اتىراۋ وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى ن.ساپاروۆ.
پىكىر قالدىرۋ