سەمەيدىڭ گارنيزوندىق وفيسەرلەر ءۇيىنىنىڭ مۋزەي قورىنا ۇلى وتان سوعىسىنىڭ ارداگەرى بالابەك راقىمجانوۆتىڭ جەكە زاتتارىن سالتاناتتى تۇردە تابىستاۋ شاراسى ءوتتى.

وسكەلەڭ ۇرپاقتىڭ پاتريوتتىق سەزىمىن وياتاتاتىن شاراعا مەكتەپ وقۋشىلارى قاتىستى. بالابەك راقىمجانوۆ اياگوزدىڭ اۋداندىق پارتياسىندا قىزمەت ەتكەن. 1941 جىلى ارنايى شاقىرتۋ الىپ سوعىسقا اتتانادى. ول ءبىرىنشى ۋكراينا مايدانىنىڭ  تانك بولىمىندە بولىپ، ۇلتتى ازات ەتۋگە جولىندا قىزمەت ەتكەن.

– مەن اكەمدى كىشكەنە كەزىمدە عانا كوردىم. ءتۇرىن ەمىس-ەمىس بىلەمىن. ويتكەنى ول 1941 جىلدىڭ ماۋسىم ايىندا سوعىسقا اتتانىپ كەتتى. ال مەن سول جىلدىڭ تامىز ايىنىڭ 20-سىندا دۇنيەگە كەلدىم. مەن ونى سوڭعى رەت كورگەنىمدە نەبارى 3 جاستا ەدىم. انامنىڭ ايتۋىنشا، اكەم بەرلينگە دەيىن جەتىپ، 1945 جىلدىڭ اقپان ايىنىڭ 24 كۇنى قايتىس بولعان. دوستارى قارالى حاباردى جەتكىزىپ حات جولداپ، اكەمدى سول جاققا جەرلەگەن. انام بۇل حابارعا سەنبەي، ءاردايىم كۇتۋمەن بولدى، – دەپ ساعىنىشپەن اكەسىن ەسكە الدى اسيا بالابەك قىزى.

ارداگەردىڭ قىزى اكەسىنىڭ بار قۇجاتىن، فوتو سۋرەتىن،  2 وردەنى بارى تۋرالى انىقتامانى، گازەتكە شىققان ماقالالاردى، جازعان حاتتارىن، سول كىسىگە تيەسىلى بارلىق قۇندى تاريحي قۇجاتتى سەنىممەن مۋزەيگە تابىستادى.

– ءبىز وتكەنىمىزدى تانىماي، كەلەشەكتى بولجاي المايمىز. ال، بولعان سوعىس ول ءبىزدىڭ وتكەن تاريحىمىز. سۇم سوعىس قانشاما اكەلەردى، اعالاردى اكەتتى. مىنە، كەلەر ۇرپاق وسىنى بىلسە ەكەن، مۇنداي سۇمدىق ەندى بولماسا ەكەن تىلەكپەن اكەم جايلى جيناعان دەرەكتەردى بەرىپ وتىرمىن، – دەدى ا. بالابەك قىزى.

سەمەي قالاسىنىڭ اقپاراتتىق ورتالىعى