ەلباسى نۇرسۇلتان ءابىش ۇلى نازاربايەۆتىڭ ۇسىنىسىمەن جاريالانعان جاستار جىلىندا جامبىل وبلىسىندا دا جۇيەلى جۇمىستار اتقارىلۋدا. اسىرەسە، ارناۋلى ورتا جانە جوعارى وقۋ ورىندارى تاراپىنان دا تياناقتى تىرلىكتەر تىكتەلۋدە. سولاردىڭ قاتارىندا م.ح.دۋلاتي اتىنداعى تاراز مەملەكەتتىك ۋنيۆەرسيتەتى دە ەگەمەن ەلىمىزدىڭ ەرتەڭى سانالاتىن جاستاردىڭ جارقىن بولاشاعى ءۇشىن ايانىپ جاتقان جوق.

بۇگىندە اتالمىش وقۋ ورداسى ستۋدەنتتەردى ءبىلىم نارىمەن سۋسىنداتىپ قانا قويماي، كاسىپكەرلىك نەگىزدەرىنە بەيىمدەۋگە دە باسىمدىق بەرۋدە. وسى ورايدا ۋنيۆەرسيتەت قابىرعاسىندا 2003 جىلدان بەرى جۇمىس جاساپ كەلە جاتقان Enactus Dulaty كومانداسىنىڭ باستامالارى قۇپتاۋعا تۇرارلىق.

ايتا كەتۋ كەرەك، باستاپقىدا ۇيىم SIFE (ستۋدەنتتەر ەركىن كاسىپكەرلىكتە) دەپ اتالعان. كەيىن ۇيىمنىڭ اۋقىمى كەڭەيە تۇسكەن. جەتەكشىسى – ءامينا ناسيبۋلينا. ونىڭ ايتۋىنشا Enactus Dulaty كومانداسىنا مۇشە بولا وتىرىپ، ستۋدەنت جاس ءوز ماماندىعىمەن قوسا، كاسىپكەرلىكتىڭ قىر-سىرىن مەڭگەرەدى، الەمدى تانيدى، كوزقاراسى وزگەرىپ، ۇمتىلىسى ارتادى. وزگەگە كومەكتەسە وتىرىپ، قوعامدى دامىتادى.

– كوماندانىڭ بەلسەندى جاستارى مۇقتاج ادامداردىڭ ءومىر ءسۇرۋ ساپاسى مەن دەڭگەيىن جاقسارتۋ ءۇشىن كاسىپكەرلىك ءادىستى پايدالانادى. وقىتۋشى مەن بيزنەس-كوشباسشىنىڭ قولداۋىنا سۇيەنە وتىرىپ، Enactus ستۋدەنتتەرى بارلىق الەمدە جوبالار جاساپ، ولاردى ىسكە اسىرادى. جوبالاردى ىسكە اسىرۋ بارىسىندا الىنعان تاجىريبە ءومىردى وزگەرتىپ قانا قويماي، سونىمەن قاتار ستۋدەنتتەرگە ناعىز كوشباسشى بولۋعا كومەكتەسەدى. ەلىمىزدە 50-دەن اسا جوو مەن كوللەدجدەرىندە Enactus كوماندالارى بار. ءساۋىر ايىندا وتكەن رەسپۋبليكالىق جارىستان ءبىزدىڭ ۋنيۆەرسيتەتتىڭ كومانداسى چەمپيون اتانىپ، اقش-تىڭ سان-حوسە قالاسىندا وتەتىن الەمدىك چەمپيوناتقا قاتىسۋعا مۇمكىندىك الدى. Enactus Dulaty كومانداسىنا ءار ءتۇرلى ماماندىقتىڭ ستۋدەنتتەرى مۇشە. ولار سان قىرلى. وسى ستۋدەنتتەر ەكونوميكالىق، ەكولوگيالىق، الەۋمەتتىك ماسەلەلەردى كوتەرىپ، جوبالارمەن جۇمىس ىستەيدى،-دەيدى ءامينا ءۋالي قىزى.

بۇگىندە كوماندا جاستارى تاراز قالاسىنداعى كولتاعان اۋماعىنىڭ پروبلەماسىن قامتي وتىرىپ، حالىقتىڭ تۇرمىسىن جاقسارتۋدا ءۇش جوبانى جۇزەگە اسىرعان. ونداعى باستى ماسەلە – اۋىلدا گاز جوق، ايەلدەر اراسىندا جۇمىسسىزدىق دەڭگەيى جوعارى. مىنە، وسى ماسەلەلەردى شەشۋ ءۇشىن ولار اۋىل ادامدارىنا شارۋاشىلىقتى جۇرگىزۋدىڭ ءتيىمدى جولدارىن كورسەتتى. ماسەلەن، جىل ايىن جەرگە پياز ەگە بەرگەن سوڭ، جەردىڭ قۇنارسىزدىعى بايقالعان. مۇنداي كەزدە ءبىر جىل بۇرشاق ەكسە جەر قايتا قۇنارلانىپ، ءونىمدى ەكى ەسە كوپ بەرەدى. اۋىل ادامدارى وسىلاي ەتتى دە. ءبىر جىل بۇرشاق، كەلەسىدە پياز ەگىپ، ەكى ەسە ونىمگە قول جەتكىزگەن. ەكىنشى جوبا، گازدىڭ جوقتىعىنا، وتىن ماسەلەسىنە قاتىستى. ال كومىردىڭ تونناسى 20 مىڭ تەڭگە شاماسىندا تۇرادى. كومىر جەتپەگەندىكتەن جەرگىلىكتى حالىق بالونداعى گازدى قولدانۋعا ءماجبۇر. بالون جارىلىپ، قايعىلى جاعداي ورىن العان وقيعالار دا بولىپ جاتىر. كوماندا جاستارى كومىر، كارتون جانە تەزەكتى بىرىكتىرۋ ارقىلى وتىن ويلاپ تاپتى. ول تۇرمىستىق قالدىقتاردان جاسالعاندىقتان، كومىردىڭ باعاسىنان الدەقايدا ارزان تۇسەدى. جانە جەرگىلىكتى حالىقتى وتىندى جاسايتىن قۇرىلعىنىڭ جۇمىسىمەن تانىستىرىپ، ءتاسىلىن ۇيرەتتى.

ال، ءۇشىنشى جوبا، جۇمىسسىزدىقپەن كۇرەسۋگە قاتىستى. اۋىلدىڭ قىز-كەلىنشەكتەرىنە جۇمساق ويىنشىقتار جاساۋدى، قول-ونەر بۇيىمدارىنىڭ ءتۇر-تۇرىن تىگۋدى ۇيرەتىپ، ونى نارىققا شىعارۋدىڭ جولدارى كورسەتىلدى. قالاي بيزنەس-جوسپار ازىرلەۋدى، الەۋمەتتىك جەلىلەردە پاراقشا اشۋ ارقىلى ءىستى قالاي العا جىلجىتۋعا بولاتىنى ايتىلدى.

قۋانتارلىعى، Enactus باعدارلاماسى ستۋدەنتتەرگە بيزنەس پەن ەكونوميكانىڭ ماسەلەسىن تولىق ءتۇسىنۋ ءۇشىن جان-جاقتى ءبىلىم، داعدى مەن تاجىريبە بەرەدى. بۇل باعدارلاما ۋنيۆەرسيتەت بىلىمىنە قوسىمشا ءبىلىم بولىپ تابىلادى، ويتكەنى ءىس جۇزىندە تەوريالىق ءبىلىمدى قولدانۋعا جانە پراكتيكالىق تاجىريبە الۋعا مۇمكىندىك مول.