اۋىل شارۋاشىلىعى ءمينيسترى ساپارحان وماروۆ نان باعاسى ازداپ وسەتىنىن مالىمدەدى، – دەپ Qamshy.kz اقپارات اگەنتتىگى حابارلايدى سپۋتنيك سايتىنا سىلتەمە جاساپ
"ءقازىر نان باعاسى وڭىرگە بايلانىستى 75-78 تەڭگە. مەن باعا بولار-بولماس وسەدى دەپ توپشىلاپ وتىرمىن. شامامەن 80-82 تەڭگەگە دەيىن"، – دەدى وماروۆ ۇكىمەتتە وتكەن باسپا ءسوز ءماسليحاتىندا.
مينيسترلىك نان باعاسىنىڭ كۇرت وسۋىنە جول بەرمەس ءۇشىن ازىق-تۇلىك كورپوراسياسىمەن بىرلەسىپ، استىق ساتىپ الۋدا. بۇدان بولەك، ءار وبلىس اكىمدىگى تۇراقتاندىرۋ قورلارىنا بيداي مەن ۇن ساتىپ الىپ، قامدانىپ جاتىر.
"جىل سايىن ىشكى نارىقتاعى باعانى تۇراقتاندىرۋ ءۇشىن، ءار جىلدىڭ اقپانىنان شىلدەسىنە دەيىن ازىق-تۇلىك كورپوراسياسى ۇن تارتۋ كومبيناتتارىنا 150 مىڭنان 250 مىڭ تونناعا دەيىن بيداي ساتادى. بيىل نان كۇرت قىمباتتاماس ءۇشىن ءبىز ىشكى نارىققا 150 مىڭ توننا استىق وتكىزدىك"، – دەدى ۆەدومستۆو باسشىسى.
اۋىل شارۋاشىلىعى مينيسترلىگىنىڭ اقپاراتىنا سۇيەنسەك، رەسپۋبليكادا 19،1 ميلليون توننا استىق باستىرىلدى.
جازدىڭ ىستىق جانە قۇرعاق بولۋىنا بايلانىستى ءداندى داقىلداردىڭ ونىمدىلىگى تومەندەگەن. اپتاپ ىستىق پەن تولاسسىز جاۋىن-شاشىن استىقتىڭ ساپاسى مەن ونىمدىلىگىنە اسەر ەتكەن.
ۇكىمەت وتىرىسىندا مينيستر بيىل ءداندى جانە ءداندى بۇرشاق داقىلدارىنىڭ ونىمدىلىگى بۋنكەرلىك سالماقتا 19 ميلليون توننانى قۇراۋى مۇمكىن ەكەنىن مالىمدەگەن ەدى. بۇل 2018 جىلعى ونىممەن سالىستىرعاندا 2 ميلليون تونناعا كەم.
پىكىر قالدىرۋ