الماتى وبلىستىق پوليسيا دەپارتامەنتىنىڭ كوشى-قون باسقارماسىنا بارىپ، بوسقىن مارتەبەسىن سۇراماق بولعان ەكى ەتنيكالىق قازاق — قاستەر مۇساحان مەن مۇراگەر ءالىمۇلىن ۇقك شەكارا قىزمەتىنىڭ ادامدارى الىپ كەتتى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ.

— الماتى وبلىستىق پوليسيا دەپارتامەنتىنىڭ كوشى-قون باسقارماسىنان بوسقىن مارتەبەسىن سۇراۋعا كەلىپ، تۇسكى ءۇزىلىس كەزىندە تاماقتانىپ وتىرعان قاستەر مۇساحان مەن مۇراگەر ءالىمۇلىن وزدەرىن "شەكارا قىزمەتىنىڭ قىزمەتكەرىمىز" دەپ تانىستىرعان ءۇش ادام كەلىپ، قۇجاتقا قول قوياسىزدار دەپ ماجبۇرلەپ اكەتتى، - دەيدى تىركەلمەگەن "اتاجۇرت ەرىكتىلەرى" ۇيىمىنىڭ مۇشەسى گۇلجان توقتاسىن قىزى.

ونىڭ ايتۋىنشا، جۇڭگو قازاقتارىنىڭ "ادۆوكاتىمىزدى شاقىرايىق" دەگەن وتىنىشىنە دە قۇلاق اسپاعان. ولاردى الماتى قالاسىنداعى بوگەنباي باتىر مەن ناۋرىزباي باتىر كوشەلەرىنىڭ قيىلىسىندا تۇرعان ۇلتتىق قاۋىپسىزدىك كوميتەتى شەكارا قىزمەتىنىڭ 2040 باقىلاۋ-وتكىزۋ پۋنكتىنە الىپ بارعان.

گۇلجان توقتاسىن قىزىنىڭ سوزىنشە، قىتايدان كەلگەن ەكى ەتنيكالىق قازاقپەن بىرگە تىركەلمەگەن "اتاجۇرت ەرىكتىلەرى" ۇيىمىنىڭ جەتەكشىسى بەكزات ماقسۇتحان ۇلى دا كىرگەن. ءقازىر قاستەر مۇساحان مەن مۇراگەر ءالىم ۇلىنىڭ ادۆوكاتى باۋىرجان ازانوۆتى ۇقك عيماراتىنا كىرگىزبەي تۇر.

بۇگىن، 14 قىركۇيەكتە ادام قۇقىعى بويىنشا حالىقارالىق بيۋرونىڭ الماتىداعى كەڭسەسىندە قىتايدىڭ شىڭجاڭ اۋدانىنان قازاقستانعا "قاشىپ كەلدىك" دەگەن ەكى ەتنيكالىق قازاق –قاستەر مۇساحان مەن مۇراگەر ءالىم ۇلى جانە ولاردىڭ قورعاۋشىلارى باۋىرجان ازانوۆ باسپا ءسوز ءماسليحاتىن وتكىزگەن ەدى.

وزدەرىنىڭ ايتۋلارىنا قاراعاندا، 1989 جىلى تۋعان قاستەر مۇساحان مەن 1994 جىلى تۋعان مۇراگەر ءالىم ۇلىنىڭ قىتايدا وتباسى قالعان. جۇڭگو شەكاراسىنان قازاننىڭ بىرىنە وتكەن ولار قازاقستاننىڭ مەملەكەتتىك شەكاراسى ارالىعىنداعى بەيتاراپ اۋماقتا 5 كۇندەي ءجۇرىپ، 6 قازاندا شىعىس قازاقسان وبلىسىنىڭ زايسان، شىلىكتى، ماڭىراق اۋىلدارىنىڭ تۇسىنان قازاقستانعا وتكەن.

قاستەر مۇساحان ۇلى قىتايدا «4 جىل 8 اي ساياسي لاگەردە وتىردىم، قىسىم جاسادى، ءۇش رەت اۋىر سوققى العاندىقتان شىداماي قازاقستانعا كەتۋگە بەل بۋدىق» دەيدى. قىتايدا قىسىم كورگەنىن، ۇرىپ سوققانىن ايتقان مۇراگەر ءالىم ۇلى ەكەۋى «قازاقستان قانداي جازاعا تارتسا دا كونەمىز، تەك قىتايعا قايتارماسا بولدى» دەگەندى ايتادى.

الماتىعا كەلگەندەرىنە ءتورت كۇن بولعان ولار بۇگىن كوشى-قون پوليسياسىنا بارىپ ارىز تۇستەرىنىن، ساياسي بوسقىن مارتەبەسىن سۇرايتىنىن مالىمدەگەن بولاتىن.

ادام قۇقىعى بويىنشا حالىقارالىق بيۋرو قىزمەتكەرى ينگا يمانباي ولارعا قۇقىقتىق تۇرعىدا قولداۋ كورسەتەتىنىن ايتتى. ادۆوكاتتارى باۋىرجان ازانوۆ بۇگىن كوشى-قون باسقارماسىنا ارىز تاپسىرىلعان سوڭ بوسقىن مارتەبەسىن الۋعا زاڭ جۇزىندە ارەكەتتەنەتىنىن مالىمدەگەن.

قىتايداعى ساياسي ۇيرەنۋ لاگەرىندە قىسىم كورىپ، قازاقستان شەكاراسىنان زاڭسىز وتۋگە ءماجبۇر بولدىم" دەگەن تاعى ءبىر جۇڭگو ازاماتى، ەتنيكالىق قازاق سايراگۇل ساۋىتباي ءىسى 2018 جىلى قازاقستان قوعامىن ەلەڭدەتكەن.

2018 جىلى مامىر ايىندا «قورعاس كەدەن بەكەتىن زاڭسىز بۇزىپ ءوتتى» دەگەن ايىپپەن قاماۋعا الىنعان سايراگۇل ساۋىتبايعا قازاقستان قىلمىستىق كودەكسىنىڭ 392 - بابى ("شەكارانى زاڭسىز بۇزىپ ءوتۋ") بويىنشا ايىپ تاعىلعان. ول سوت پروسەسى باستالار قارساڭدا جانە ودان كەيىن قازاقستاننان بوسقىن مارتەبەسىن الا الماعان. وعان الماتى وبلىستىق پوليسيا دەپارتامەنتىنىڭ كوشى-قون باسقارماسى وعان "پانا ىزدەۋشى تۇلعا" كۋالىگىن بەرگەن ەدى.

سوت سايراگۇل ساۋىتبايدى التى اي باس بوستاندىعىنان ايىرۋعا، ءبىراق ونى "جازاسىن جەڭىلدەتەتىن ەرەكشە جاعدايىنا" بايلانىستى شارتتى جازاعا الماستىرۋعا ۇكىم ەتكەن. وسىلايشا سوت سايراگۇل ساۋىتبايدى قىتايعا دەپورتاسيالاماي، قازاقستاندا قالدىرعان. بۇدان كەيىن سايراگۇل ساۋىتبايدى شۆەسيا قابىلداعان بولاتىن.