الماتى اكىمى باقىتجان ساعىنتايەۆ «بۋريەۆەستنيك الماتى» ۆولەيبول كلۋبىنىڭ ويىنشىلارىمەن، جاتتىقتىرۋشىلار قۇرامىمەن جانە اكىمشىلىگىمەن كەزدەسىپ، 2019 جىلعى قازاقستان كۋبوگىن جەڭىپ الۋلارىمەن قۇتتىقتادى، – دەپ جازادى اكىمدىكتىڭ باسپا ءسوز قىزمەتى.
قالا باسشىسى بارشا ۇجىمنىڭ ۇيلەسىمدى جۇمىسىنىڭ ارقاسىندا وسىنداي بيىك ناتيجەگە قولجەتكەنىن اتاپ ءوتتى، سونىمەن قاتار «بۋريەۆەستنيك الماتى» ج ش س ديرەكتورى، گەنەرال-مايور، كسرو-نىڭ سپورت شەبەرى امانگەلدى شابداربايەۆقا، كوماندانىڭ باس جاتتىقتىرۋشىسى، قازسسر-نىڭ ەڭبەك سىڭىرگەن جاتتىقتىرۋشىسى الەكساندر زاپيەۆالوۆقا، جاعاجاي ۆولەيبولىنىڭ باس جاتتىقتىرۋشىسى دەنيس روۆكينگە العىس ءسوزىن ءبىلدىردى.
«سپورتتاعى لايىقتى ناتيجە بۇل – وقىستان بولاتىن جاعداي نەمەسە ءىستىڭ وڭىنان تۋۋى ەمەس. بۇل – ۇنەمى ايانباي تەر توگۋدىڭ، ءوز كۇشىنە سەنۋدىڭ جانە جەڭىسكە جەتۋدەگى زور ءۇمىتتىڭ ناتيجەسى. مەن كۇندەلىكتى جاتتىعۋلاردىڭ قۋانىش اكەلۋىن، تارىققان ساتتەردە سەنىمنىڭ العا جەتەلەۋىن، ەرەن ەڭبەكتىڭ لايىقتى جەڭىسپەن ماراپاتتالۋىن تىلەيمىن!»، – دەدى الماتى اكىمى.
كومانداعا اقشالاي سەرتيفيكات، كلۋب ديرەكتورى امانگەلدى شابداربايەۆقا قالاعا سىڭىرگەن ەڭبەگى ءۇشىن «ەڭبەگى ءۇشىن» توسبەلگىسى تاپسىرىلدى.
«ەلىمىزدىڭ سپورت ورتالىعى رەتىندە الماتى قالانىڭ سپورت جەتىستىكتەرى قورجىنىنا ۇلەس قوساتىن كوماندالارعا قولداۋ كورسەتەتىن بولادى»، – دەپ اتاپ ءوتتى ب. ساعىنتايەۆ.
«بۋريەۆەستنيك الماتى» ۆولەيبول كلۋبى حح عاسىردىڭ ورتاسىندا كسرو چەمپيونى، ەۋروپا كۋبوگىنىڭ ەكى دۇركىن يەگەرى اتانعان ءارى اڭىزعا اينالعان «بۋريەۆەستنيك» كلۋبىنىڭ داستۇرلەرىن جالعاستىرۋدا.
پىكىر قالدىرۋ