«سيفرلى شىعىس – 2019» فورۋمىنىڭ اياسىندا ءوڭىر مەكتەپتەرىندە ءبىلىم الىپ جاتقان وقۋشىلار StartUp جوبالاردى قورعادى. فورۋم شقو اكىمدىگىنىڭ ينۆەستيسيالىق ورتالىعىندا ءوتتى. وعان قاتىسۋشىلار 15 ۇزدىك جوبانى ۇسىندى.

قازىلار القاسىنىڭ قۇرامىندا وبلىس اكىمى اپپاراتىنىڭ وكىلدەرى، جوو مەن وڭىردەگى ىت-كومپانيالاردىڭ ماماندارى بولدى.

– بايقاۋ جىل سايىن ءداستۇرلى تۇردە ۇيىمداستىرىلىپ كەلەدى. مۇندا IT-تەحنولوگيا سالاسىن جەتىك بىلەتىن بالالار جينالدى، – دەدى وبلىس اكىمى اپپاراتى باسشىسىنىڭ ورىنباسارى مارينا گاگارينا. – وتكەن جىلى StartUp-جوبالار بايقاۋىنا 10 مەكتەپتىڭ وقۋشىلارى قاتىستى. ال بيىل ولاردىڭ قاتارى ەكى ەسەگە ارتتى. بۇل – قۋانتارلىق كورسەتكىش. بالالاردىڭ ۇسىنىپ وتىرعان جوبالارى جان-جاقتى قامتىلعان. ونىڭ ىشىندە ءبىلىم بەرۋ، دەنساۋلىق ساقتاۋ، قاۋىپسىزدىك جانە اۋىل شارۋاشىلىعى سالالارىنا قاتىستى جوبالار دا بار. مىسالى، تەڭگە الۋ، «اقىلدى مەكتەپ»، سونداي-اق تاسقىننىڭ الدىن الۋ سىندى قىزىقتى جوبالاردى ۇسىنىپ، ونى ىسكە اسىرۋدى جوسپارلاپ وتىر.

بايقاۋدىڭ قورىتىندىسى «سيفرلى شىعىس – 2019» IT-فورۋمىندا جاريالاناتىن بولادى.