پرەزيدەنت قاسىم-جومارت توقايەۆ پاتەردى جالعا بەرۋ نارىعىن رەتتەپ، باسپانا قۇرىلىسىنىڭ وزىندىك قۇنىن جۇيەلى تۇردە تومەندەتۋ كەرەك ەكەنىن ايتتى.
اقوردادا مەملەكەت باسشىسىنىڭ توراعالىعىمەن ەكونوميكالىق ماسەلەلەر جونىندەگى كەڭەس ءوتتى. پرەزيدەنت ءبىرقاتار تاپسىرما بەردى، – دەپ توقايەۆتىڭ باسپا ءسوز قىزمەتى حابارلايدى.
"ءاربىر قازاقستاندىق پاتەردى جالعا نەمەسە ساتىپ الۋ مۇمكىندىگى مەن شارتتارىن انىق ءتۇسىنۋى ءتيىس. بۇل ءۇشىن باسپانانىڭ قولجەتىمدىلىگىنە قاتىستى شارتتاردى انىقتاۋ كەرەك. قۇرىلىستىڭ وزىندىك قۇنىن جۇيەلى تۇردە تومەندەتىپ، كوپپاتەرلى جانە جەكە باسپانانىڭ اراجىگىن اجىراتىپ، پاتەردى جالعا بەرۋ نارىعىن رەتتەۋ كەرەك"، – دەدى قاسىم-جومارت توقايەۆ.
باسپانا جايى ەلدەگى ەڭ وزەكتى ماسەلەلەردىڭ ءبىرى. مەملەكەت باسپانانى قولجەتىمدى ەتە ءتۇسۋ ءۇشىن ءبىرقاتار باعدارلامانى ىسكە قوستى. وعان سايكەس، كەيبىر تۇرعىندار جالعا بەرىلەتىن پاتەرگە يە بولادى نەمەسە پاتەردى جەڭىلدىكپەن ساتىپ الادى.
كەڭەستە ەلدىڭ الەۋمەتتىك-ەكونوميكالىق دامۋىنىڭ قورىتىندىسى، اقشا-كرەديت ساياساتىن جۇزەگە اسىرۋ، اتاۋلى الەۋمەتتىك كومەك رەفورماسى مەن الەۋمەتتىك ماسەلەلەردى تالقىلاندى.
پىكىر قالدىرۋ