جامبىل وبلىسىندا زاڭسىز جولاۋشىلار تاسىمالىنىڭ الدىن-الۋ، جويۋ ماقساتىندا جەرگىلىكتى اتقارۋشى ورىندارمەن، قۇقىق قورعاۋ قورعاۋ ورگاندارى جانە سالاعا جاۋاپتى رەسپۋبليكالىق مەكەمەلەردىڭ وبلىستاعى فيليالى بىرلەسكەن رەيدتىك شارالار ۇيىمداستىرۋدا. بۇل شارالاردىڭ ناتيجەسىندە زاڭسىز جولاۋشىلار تاسىمالداۋشىلاردى تاكسي مەكەمەلەرىنە تىركەۋ جۇمىستارىمەن قاتار ولاردىڭ باعاسىن قولجەتىمدى ەتۋگە مۇمكىندىك بەرىلدى، دەپ جازادى Qamshy.kz اقپارات اگەنتتىگى. 

زاڭسىز جولاۋشىلار تاسىمالى جولاۋشىلاردىڭ ومىرىنە ءقاۋىپ ءتوندىرىپ قانا قويماي، «كولەڭكەلى ەكونوميكانىڭ» كەڭ ەتەك جايۋىنا جول اشاتىن كۇردەلى ماسەلە. سوندىقتان جامبىل وبلىسىندا اتالعان ماسەلەنى تۇبەگەيلى شەشۋ باعىتىندا ءبىرقاتار شارالار قولعا الىندى. ءوز كەزەگىندە بۇل شارالار اياسىندا جەرگىلىكتى اتقارۋشى ورگاندار مەن قۇقىق قورعاۋ ورگاندارىنىڭ بىرلەسە ارەكەت ەتۋدە. مۇنداي شارالار ازىرگە رەيدتىك تەكسەرىس سيپاتىندا ءوتىپ جاتىر. قۇزىرلى ورگان قىزمەتكەرلەرى مەن بيلىك وكىلدەرى زاڭسىز جولاۋشىلار تاسىمالداۋشىلارعا تۇسىندىرمە جۇمىستارىن جۇرگىزىپ، جادىنامالار تاراتۋدا. سونداي-اق جولاۋشى تاسىمالداۋدىڭ زاڭىن كوزگە ىلمەگەندەرگە اكىمشىلىك حاتتامالار دا تولتىرىلۋدا. ماسەلەن اعىمداعى جىلدىڭ ءى توقسانىندا تاراز قالاسىمەن اۋدانداردا ۇيىمداستىرىلعان 42 رەيدتىك شارا كەزىندە 316 تۇلعانىڭ ۇستىنەن اكىمشىلىك حاتتاما تولتىرىلعان. سونداي-اق ستيحيالىق ورىندار ماڭىنان ارنايى تۇراققا ۇيىمداستىرۋعا جەر تەلىمى قاراستىلىپ جاتىر. بۇل جۇمىس ازىرگە تاراز قالاسى اۋماعىنداعى جەرگىلىكتى جۇرت اراسىندا «جانسايا»، «سەلپو» اتالىپ كەتكەن تۇراقتاردا قولعا الىندى. سونىمەن بىرگە رەيدتىك شارالار كەزىندە زاڭسىز جولاۋشىلار تاسىمالىمەن اينالىسىپ كەلگەن جەكە كولىگى بار 1553 جۇرگىزۋشى تاكسي مەكەمەلەرىنە تىركەلدى.

زاڭسىز جولاۋشىلار تاسىمالىنا قارسى تۇرۋدا وڭىردەگى اۆتوۆوكزالداردىڭ الەۋەتى دە سارالانىپ، ولاردىڭ مۇمكىندىگىنە مولىنان پايدالانۋ جۇمىستارىنا نازار اۋدارىلۋدا.

–ءقازىر وبلىس اۋماعىندا 1 اۆتوۆوكزال، 9 اۆتوستانسيا جانە 3 جولاۋشىلارعا قىزمەت كورسەتۋ پۋنكتى جۇمىس جاسايدى. ولاردى كەيبىر اۋداندارالىق، اۋدان ورتالىعىمەن تاراز قالاسىنا جولاۋشىلاردى تاسىمالداۋمەن اينالاسسا، كەيبىرىندە وبلىستىق، رەسپۋبليكالىق، حالىقارالىق ماڭىزداعى 41 باعىتقا دەيىن بار. جىل سوڭىنا دەيىن جەكە ينۆەستيسيا ەسەبىنەن 4 جولاۋشىلارعا قىزمەت كورسەتۋ پۋنكتى اشىلماق. بۇل مەكەمەلەردىڭ كومەگىمەن دە زاڭسىز جولاۋشىلار تاسىمالىن ازايتۋعا قول جەتكىزىلمەك، – دەيدى وبلىس اكىمدىگىنىڭ جولاۋشىلار كولىگى جانە اۆتوموبيل جولدارى باسقارماسىنىڭ باسشىسى باقىتجان جانىبەكوۆ.