زامان اعىمىمەن قوعام ءومىرىنىڭ بارلىق سالاسىنا ءوز سەپتىگىن تيگىزگەن سيفرلاندىرۋ ۇدەرىسىنەن جامبىل وبلىسىنداعى ءبىلىم بەرۋ ۇيىمدارى دا شەت قالمادى. ناتيجەسىندە وڭىردەگى بالاباقشالارعا بالالاردى كەزەككە قويۋ، جولداما الۋعا، مەكتەپتىڭ 1-سىنىبىنا قابىلداۋ، جازعى ساۋىقتىرۋ جانە دەمالىس لاگەرلەرىنە جولداما بەرۋ تەحنيكالىق جانە كاسىپتىك ءبىلىم بەرۋ مەكەمەلەرىنە وقۋعا ءتۇسۋ جۇمىستارى تولىعىمەن اۆتوماتتاندىرىلدى. ەندىگى كەزەكتە اتا-انالار ءۇشىن بالالارىن ءبىلىم بەرۋ ۇيىمدارىنا ورنالاستىرۋدا ولاردىڭ تابالدىرىعىن توزدىرۋدىڭ قاجەتى شامالى. قۇجات قابىلداۋ جۇيەسى تولىعىمەن «ەلەكتروندى ۇكىمەت» پورتالىندا جۇرگىزىلۋدە، دەپ جازادى Qamshy.kz اقپارات اگەنتتىگى. 

بۇگىندە وبلىستاعى بارلىق ءبىلىم بەرۋ ۇيىمدارى ءبىرىڭعاي ساندىق جۇيەگە قوسىلعان. سونىڭ ەسەبىنەن جامبىلدىق بۇلدىرشىندەردى بالاباقشاعا كەزەككە قويۋ جانە جولداما الۋ جۇمىستارى edugarden.kz سايتى ارقىلى جۇرگىزىلە باستادى. ال بالالاردى مەكتەپكە 1 سىنىپقا قابىلداۋ جانە جازعى ساۋىقتىرۋ جانە دەمالىس لاگەرلەرىنە جولداما بەرۋ eduschool.kz سايتىندا ىسكە اسۋدا. ءبىلىم باسقارماسىنا قاراستى تەحنيكالىق جانە كاسىپتىك ءبىلىم بەرۋ مەكەمەلەرىنە ستۋدەنت قابىلداۋ zhambyltipo.kz سايتى ارقىلى جۇرگىزىلەدى.

–بۇگىندە ءبىلىم سالاسى بويىنشا 37 مەملەكەتتىك قىزمەت كورسەتىلسە، تاعى 15ء-ى اۆتوماتتاندىرىلعان رەجيمدە قولجەتىمدى بولا ءتۇستى. جىل سوڭىنا دەيىن تاعى 13 مەملەكەتتىك قىزمەت ءتۇرى ەلەكتروندى رەجيمگە اۋىسادى. وسىلايشا جىل سوڭىنا دەيىن ءبىلىم سالاسىندا كورسەتىلەتىن مەملەكەتتىك قىزمەتتىڭ 75،6 پايىزى اۆتوماتتاندىرىلماق، –دەيدى وبلىس اكىمدىگىنىڭ ءبىلىم باسقارماسىنىڭ باسشىسى راحيا تۇرماعانبەتوۆا.

سايكەسىنشە اعىمداعى وقۋ جىلىندا مەكتەپكە 1 سىنىپقا قابىلداۋ تۋرالى 25100 ءوتىنىش ەلەكتروندى تۇردە بەرىلدى. سونداي-اق 27091 بالاعا قالا سىرتىنداعى جانە مەكتەپ جانىنداعى لاگەرلەرگە جولداما ەلەكتروندى بازاعا تۇسكەن وتىنىشىنە ساي بەرىلدى.

ءبىلىم بەرۋ سالاسىندا كورسەتىلەتىن قىزمەتتەردى سيفرلاندىرۋمەن بىرگە جامبىلدىق مەكتەپتەردە وقۋشىلاردىڭ سيفرلىق ساۋاتتىلىعىن ارتتىرۋعا دەن قويىلعان. وتكەن جىلى تاراز قالاسى مەن اۋداندار 14 IT سىنىبى اشىلسا، بيىل جىلى 24 IT سىنىپ اشىلدى. سونىمەن قاتار وبلىس مەكتەپتەرىنىڭ 52.26 پايىزى روبوتوتەحنيكا كابينەتتەرىمەن جابدىقتالدى.