جامبىل وبلىسىنداعى مەكتەپتەردە مۇمكىندىك شەكتەۋلى جانداردىڭ الاڭسىز ءبىلىم الۋىنا لايىقتى جاعداي جاسالىپ كەلەدى. ەلىمىزدەگى الەۋمەتتىك ساياساتتىڭ باسىم باعىتتارىنىڭ بىرىنە جاتاتىن بۇل شارالار ءوڭىر مەكتەپتەرىنىڭ 76،9 پايىزىن قامتىعان، دەپ جازادى Qamshy.kz اقپارات اگەنتتىگى. 

ءقازىر وڭىردەگى 340 مەكتەپتە ينكليۋزيۆتى ءبىلىم بەرۋگە بار جاعداي جاسالعان. اتاپ ايتقاندا ولار پاندۋستارمەن، سۇيەنەتىن جاقتاۋلارمەن جانە كەڭ ەسىكتەرمەن، تاكتيلدى جولدارمەن جابدىقتالعان.سونداي-اق 400 مەكتەپكە دەيىنگى ءبىلىم مەكەمەسىنىڭ 171ء-ى ەرەكشە ءبىلىم بەرۋدى قاجەت ەتەتىن بۇلدىرشىندەرگە لايىقتى ورتا قالىپتاسقان. بۇگىندە وبلىس اۋماعىندا مەكتەپكە دەيىنگى تاربيەلەۋ ورىندارى مەن ورتا مەكتەپتەردە 7961 مۇمكىندىگى شەكتەۋلى بالا ءبىلىم الاتىنىن ەسكەرسەك ولار ءۇشىن قولايلى ورتا قالىپتاستىرۋدىڭ ماڭىزدىلىعى ەش تالاس تۋدىرمايدى.

سونىمەن قاتار وڭىردە مۇمكىندىگى شەكتەۋلى بالالاردى دامىتۋ، ولارعا مەيلىنشە قولايلى جاعداي جاساۋ ماقساتىندا وبلىس اكىمدىگىنىڭ ءبىلىم باسقارماسى اعىمداعى جىلدىڭ اقپان ايىندا نۇر-سۇلتان قالاسىنداعى ۇلتتىق وڭالتۋ ورتالىعى جانە الماتى قالاسىنداعى «بولاشاق» كورپوراتيۆتىك قورىمەن ىنتىماقتاستىق تۋرالى مەموراندۋمعا قول قويدى. اتالعان مەموراندۋمعا ساي جاڭا وقۋ جىلى باسىندا تاراز قالاسىنداعى №32 ورتا مەكتەپتىڭ بازاسىندا «ءار بالا مەكتەپكە لايىقتى» جوباسى ىسكە قوسىلىپ، اۋتيزم جانە باسقا دا دەرتتەرگە شالدىققان بالالارعا ارنالعان ينكليۋزيۆتى قولداۋ كابينەتى اشىلدى. ءقازىر مۇندا 9 مۇمكىندىگى شەكتەۋلى بالا كەدەرگىسىز ءبىلىم الۋدا. سونداي-اق «DARA» جانە «SAMRUK KAZYNA تRUST» قايىرىمدىلىق قورلارىنىڭ قولداۋىمەن تاراز قالاسىنداعى №25 ورتا مەكتەپ جانىنان ينكليۋزيۆتى ءبىلىم بەرۋدىڭ رەسۋرستىق كابينەتى جۇمىس ىستەيدى باستايدى. بۇل رەسۋرستىق كابينەت ارقىلى 125 بالا ينكليۋزيۆتى ءبىلىم بەرۋمەن قامتىلعان. جىل سوڭىنا تاراز قالاسىنداعى №20 ورتا مەكتەپتىڭ جانىنان 100 بالانى قامتيتىن پسيحولوگيالىق-پەداگوگيكالىق تۇزەتۋ كابينەتى اشىلماق. مۇمكىندىگى شەكتەۋلى مەكتەپ وقۋشىلارىنا قولايلى جاعداي جاساۋ ماقساتىندا ق ر تۇڭعىش پرەزيدەنتى – ەلباسى قورىنىڭ باستاماسىمەن تۇزىلگەن «قامقورلىق» جول كارتاسى اياسىندا تاراز قالاسىنداعى №9، №35 ورتا مەكتەپتەردىڭ جانىنان ينكليۋزيۆتى ءبىلىم بەرۋدىڭ رەسۋرستىق كابينەتتەرى اشىلماق.