جامبىل وبلىسىنداعى ارناۋلى ورتا ءبىلىم بەرۋ ورىندارىندا كاسىپتىك مامانداردى دايارلاۋدا ەڭ اۋەلى ەڭبەك نارىعىنىڭ سۇرانىسى ەسكەرىلدى. جاڭا وقۋ جىلىندا وبلىس كوللەدجدەرىندە 47 ماماندىققا 3082 مەملەكەتتىك ءبىلىم بەرۋ تاپسىرىسى بولىنگەن، دەپ جازادى Qamshy.kz اقپارات اگەنتتىگى. 

ءقازىر وبلىس اۋماعىندا 46 كوللەدج جۇمىس جاساسا ونىڭ 23ء-ى مەملەكەتتىك مەنشىكتە بولسا، قالعان 23ء-ى جەكەمەنشىك تيەسىلى. وڭىردەگى ارناۋلى ورتا كاسىپتىك ءبىلىم بەرۋ ۇيىمدارىنا بولىنگەن مەملەكەتتىك تاپسىرىستىڭ 56،7 پايىزى «بارشاعا ارنالعان تەگىن كاسىپتىك تەحنيكالىق ءبىلىم بەرۋ» جوباسى اياسىندا جۇمىسشى ماماندىقتارىنا بەرىلدى. جالپى وڭىردەگى كوللەدج ستۋدەنتتەرىنىڭ 50،9 پايىزى مەملەكەتتىك تاپسىرىس نەگىزىندە تەگىن ءبىلىم الىپ جاتىر. بۇل وتكەن وقۋ جىلىمەن سالىستىرعاندا 1028 ورىنعا ارتىق.

–وڭىردەگى تەحنيكالىق جانە كاسىپتىك ماماندارىن دايىنداۋ جۇمىستارى ەڭبەك نارىعىنداعى قاجەتتىلىكتى زەردەلەۋدە باستالادى. بۇل جۇمىستار اۋداندارداعى جۇمىسپەن قامتۋ ورتالىقتارىنىڭ سۇرانىسىنا ساي جۇرگىزىلەدى. سايكەسىنشە سۇرانىستاردى اۋدان، قالا اكىمدەرىنىڭ تىكەلەي باقىلاۋىمەن تۇزىلەدى. بيىل وڭىردەگى كاسىپتىك ماماندارعا سۇرانىس كولەمى 4345 ورىندى قۇرادى. سونداي-اق «اتامەكەن» ۇلتتىق كاسىپكەرلەر پالاتاسىنىڭ وبلىستىق فيليالىمەن جۇرگىزىلگەن سكرينينگ قورىتىندىسىن دا باسشىلىقتا ۇستايمىز. 5926 كاسىپكەرلىك نىساندا جۇرگىزىلگەن سكرينيگ قورىتىندىسى ولارداعى كادر تاپشىلىعى 3562 ورىن ەكەندىگىن انىقتالدى. وسى سۇرانىستاردى ەسكەرىپ 2019-2020 وقۋ جىلىنا 29 كوللەدجگە 47 ماماندىق بويىنشا 3082 مەملەكەتتىك ءبىلىم بەرۋ تاپسىرىسى ءبولىندى،– دەيدى وبلىس اكىمدىگىنىڭ ءبىلىم باسقارماسى باسشىسىنىڭ ورىنباسارى تالعات جامالوۆ.

جامبىل وبلىسى اكىمدىگىنىڭ ءبىلىم باسقارماسى «جاس مامان» جوباسى بويىنشا ەڭبەك نارىعىندا سۇرانىسقا يە ماماندىقتار بويىنشا بىلىكتى كادرلار دايارلاۋعا دا باسا نازار اۋدارىپ كەلەدى. وبلىستا 10 كوللەدجدە نارىقتا سۇرانىسقا يە 100 ماماندىق بويىنشا «100/200» قاعيداتى بويىنشا مامان دايارلاۋ جۇزەگە اسىرىلماق.

مەملەكەتتىك تاپسىرىس ەسەبىنەن ارناۋلى ورتا ءبىلىم العان ستۋدەنتتەردىڭ جۇمىسپەن قامتىلۋى دا وزەكتى ماسەلە. بۇل ورايدا ولاردى وندىرىستىك تاجىريبەدەن وتكەن ورنىنان قىزمەتىن جالعاستىرۋعا مۇمكىندىك بەرۋدىڭ تەتىكتەرى دە قاراستىرىلۋدا. اسىرەسە مامان دايارلاۋدا دۋالدى وقىتۋدىڭ ەنگىزۋدىڭ ماڭىزى زور. بۇگىندە دۋالدى وقىتۋ جۇيەسى وڭىردەگى 35 كوللەدجدە ەنگىزىلىپ، ولار 193 كاسىپورىنمەن ءۇش جاقتى كەلىسىمشارتقا وتىردى. ناتيجەسىندە وتكەن جىلى دۋالدىق وقىتۋ جۇيەسىمەن وقۋىن اياقتاعان 1588 تۇلەكتىڭ 75 پايىزى جۇمىسپەن قامتىلدى. جۇمىس بەرۋشى مەن كوللەدجدەر اراسىندا 3581 تۇلەكتى جۇمىسپەن قامتۋ تۋرالى 726 كەلىسىم شارت جاسالدى.