جۋىردا بەنزيننىڭ بارلىق ءتۇرى قىمباتتايدى. بۇل تۋرالى ۇلتتىق ەكونوميكا ءمينيسترى رۋسلان دالەنوۆ  ءماجىلىس وتىرىسىندا مالىمدەدى، – دەپ Qamshy.kz اقپارات اگەنتتىگى حابارلايدى، "استانا" تەلەارناسىنا سىلتەمە جاساپ. 

ۆەدومستۆو باسشىسى ونى اكسيز قۇنىنىڭ وسۋىمەن بايلانىستىردى. ءقازىر 8 تەڭگە بولسا، الداعى ۋاقىتتا 10 تەڭگەگە قىمباتتاۋى مۇمكىن. ءوسىم 6 پايىزدى قۇراماق. بۇل بەنزيننىڭ بارلىق تۇرىنە قاتىستى. جوبا 1 جەلتوقساننان باستاپ كۇشىنە ەنگىزىلمەك. 

"بۇگىندە اي-92 شامامەن 150 تەڭگە، كەي جەرلەردە ءبىر ءليترى 149-152 تەڭگە. كورشى ەلدەرمەن سالىستىرعاندا بۇل وتە از. بەنزين قۇنىنىڭ جارتىسىنا جۋىعى اكسيز بولسا، بىزدە تەك 8 تەڭگە. باعا ارى كەتسە 10 تەڭگەگە ءوسۋى مۇمكىن. ەكى ەسە وسپەيدى"، – دەدى رۋسلان دالەنوۆ ءماجىلىس قابىرعاسىندا. وسى ۋاقىتقا دەيىن ەنەرگەتيكا ءمينيسترى قانات بوزىمبايەۆ كورشى ەلدەرمەن سالىستىرعاندا وتاندىق جانار-جاعارمايدىڭ قۇنى ارزان بولعاندىقتان، شەكارا اسىپ جاتقانىن ايتقان ەدى. سوندىقتاندا بەنزين باعاسى كەزەڭ-كەزەڭىمەن شەكارالاس مەملەكەتتەرمەن تەڭەسەتىنىن جەتكىزدى.