ەلوردادا ەلباسىنىڭ توراعالىعىمەن ۇكىمەت مۇشەلەرىنىڭ، «نۇر وتان» پارتياسىنىڭ جانە ونىڭ ماجىلىستەگى فراكسياسىنىڭ قاتىسۋىمەن جينالىس ءوتتى.
جينالىس بارىسىندا ن.نازاربايەۆ دەپۋتاتتاردىڭ ايماقتارعا جۇمىس ساپارلارىنىڭ فورماتىن قايتا قاراۋدى جانە پارتيانىڭ قوعامدىق قابىلداۋ بولمەلەرىندە العاشقى كوشباسشىلاردىڭ ازاماتتارمەن كەزدەسۋلەرىن وتكىزۋ جۇمىستارىن جانداندىرۋدى تاپسىردى.
"زەرتتەۋ ناتيجەسى "نۇر وتان" پارتياسى دەپۋتاتتارىنىڭ بۇقارالىق اقپارات قۇرالدارىن جەتكىلىكتى قولدانبايتىنىن كورسەتتى. سونداي-اق، پارتيا حالىقتى مازالايتىن ماسەلەلەرگە اسا ارالاسا بەرمەيدى. سوڭعى بىرنەشە ايدا پارتيا مۇشەلەرى اتىشۋلى بىردە-بىر جاعدايعا قاتىستى ءوز پىكىرىن بىلدىرمەدى"، – دەدى قازاقستاننىڭ تۇڭعىش پرەزيدەنتى.
سونىمەن قاتار، ەلباسى فراكسيا پروسەسىندە بيۋروكراتيا مەن كەشەندى ۇيلەستىرۋ پروسەدۋرالارىن الىپ تاستاۋ قاجەتتىگىن ايتتى. ودان وزگە نازاربايەۆ پارتيا ورگاندارىنا پارتيالىق باقىلاۋ كوميتەتى مەن سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ جۇمىسىن جانداندىرۋدى تاپسىردى.
"بۇل ورگاندارعا كىرەتىن دەپۋتاتتار ءوز جۇمىسىنا بەلسەندى ىستەۋى كەرەك. سىزدەر جەدەل سۇراقتاردى سىندارلى تۇردە قويىپ، ناقتى شەشىمدەر ۇسىنىپ، وعان ءبىزدىڭ جۇرتشىلىق قاتىسۋى كەرەك"، – دەدى پارتيا ءتوراعاسى.
سونىمەن بىرگە، قازاقستاننىڭ تۇڭعىش پرەزيدەنتى فراكسيا دەپۋتاتتارى وزدەرىنە ەل كونستيتۋسياسى سەنىپ تاپسىرعان زاڭنامالىق باستامانى ءىس جۇزىندە قولدانا المايتىندىعىن اتاپ ءوتتى.
"دەپۋتاتتار – پارتيانىڭ تىرەگى، بەلسەندى ەلەكتوراتتىڭ نەگىزى. حالىق سىزگە ءتيىستى بيلىكتى پارتيا ارقىلى بەردى. ازاماتتارىمىزدىڭ ماسەلەلەرىن شەشۋ ءۇشىن جۇمىس جاساۋلارىڭىز كەرەك"، – دەدى ەلباسى.
ءسوز سوڭىندا نۇرسۇلتان نازاربايەۆ پارتيانىڭ ساياسي كوشباسشىلىعىن ساقتاۋدىڭ ماڭىزدىلىعىن اتاپ ءوتتى.
"ءبىزدىڭ باستى مىندەتىمىز – تۇراقتىلىقتى ساقتاۋ. قازاقستاننىڭ وركەندەۋى مەن قاراپايىم ازاماتتاردىڭ ءال-اۋقاتىن جاقسارتۋعا ۇلەس قوسۋ. سوندىقتان ۋادەلەرىمىزدى ورىنداۋ ءۇشىن بار كۇشىمىزدى سالۋ كەرەك"، – دەپ تۇيىندەدى پارتيا ءتوراعاسى.
