قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «سىندارلى-قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ كەپىلى» اتتى حالىققا ارناعان جولداۋىندا دا «شاعىن، اسىرەسە، ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن اۋىل تۇرعىندارىنا تۇراقتى جۇمىس بەرەدى، جۇمىسسىزدىقتى ازايتادى. سونىمەن قاتار سالىق بازاسىن قۇراپ، جەرگىلىكتى بيۋدجەتتى نىعايتادى. سونداي-اق جاپپاي كاسىپكەرلىكتى دامىتۋ ساناعا سىڭگەن پاتەرناليستىك پيعىل مەن ماسىلدىقتان ارىلۋعا مۇمكىندىك بەرەدى. ەلىمىزدە كاسىپكەرلىكتى دامىتۋدىڭ ۇلگى بولارلىق مىسالدارى جەتكىلىكتى. ءبىز شاعىن كاسىپكەرلىكتى بۇكىل قوعام بولىپ قولداۋىمىز كەرەك»،– دەپ اتاپ كورسەتكەن بولاتىن.

بۇل باعىتتا جامبىل وبلىسىندا دا جۇيەلى جۇمىستار اتقارىلۋدا. مىسالى، «دامۋ» كاسىپكەرلىكتى دامىتۋ قورىنىڭ جامبىل وبلىستىق فيليالى تاراپىنان وڭدەۋشى ونەركاسىپ سالاسىندا جۇمىسپەن قامتىلعان شاعىن جانە ورتا كاسىپكەرلىك سۋبەكتىلەرىن قولداۋ باعدارلاماسى ءوز جەمىسىن بەرۋدە.

بۇل باعدارلاما 2014 جىلدان باستاپ جۇزەگە اسىرىلۋدا. وسى باعدارلاماعا قازاقستان رەسپۋبليكاسىنىڭ ۇلتتىق قورىنان بارلىعى 200 ميلليارد تەڭگە كولەمىندە قاراجات بولىنگەن بولاتىن. اتالعان قاراجاتتى دامۋ قورى وڭدەۋ ونەركاسىبى سالاسىندا جۇمىس ىستەيتىن كاسىپكەرلەرگە جەڭىلدىك شارتتارىمەن كرەديت بەرۋ ءۇشىن ەكىنشى دەڭگەيدەگى بانكتەرگە ورنالاستىرعان بولاتىن. بۇل باعدارلاما قاراجات ەسەبىنەن 19 ميلليارد تەڭگەسى جامبىل وبلىسىنىڭ كاسىپكەرلەرىن قارجىلاندىرۋعا جۇمسالدى، ناتيجەسىندە 56 كاسىپكەر قولداۋعا يە بولدى. ونىڭ ىشىندە 12 كاسىپكەر اعىمداعى جىلعى التى ايدىڭ ىشىندە جالپى نەسيە سوماسى 587،2 ميلليون تەڭگە كولەمىندە قارجىلاندىرىلدى.

سونىمەن قاتار «بەرەكە» شاعىن جانە ورتا كاسىپكەرلىكتى وڭىرلىك قارجىلاندىرۋ باعدارلاماسىنىڭ دا تيگىزىپ جاتقان كومەگى كوپ.

جوعارىدا اتالعان مەملەكەتتىك باعدارلامالاردىڭ بولۋىنا قاراماستان، ءبىزدىڭ وبلىستا جەڭىلدەتىلگەن قارجىلاندىرۋ كولەمىن ۇلعايتۋ ماقساتىندا، جامبىل وبلىسى اكىمدىگى مەن دامۋ قورى بىرلەسىپ تەپە-تەڭدىك نەگىزدە قاراجات ءبولۋدى كوزدەيتىن «بەرەكە» وڭىرلىك باعدارلاماسى ازىرلەنىپ، ونى 2016 جىلدان بەرى جۇزەگە اسىرۋدا. ماسەلەن، 2016 جىلى 500 ميلليون تەڭگەگە العاشقى قاراجات پۋلى قۇرىلدى. ونىڭ 250،0 ميلليون تەڭگەسى جامبىل وبلىسىنىڭ اكىمدىگىنەن، ال قالعان 250،0 ميلليون تەڭگەسى «دامۋ» قورىنان ءبولىندى. كورسەتىلگەن قاراجات سول جىلى «قازكوممەرسبانك» جانە «قازاقستان حالىق بانكى» اكسيونەرلىك قوعامدارىندا ورنالاستىرىلدى. ناتيجەسىندە «بەرەكە-1» باعدارلاماسى شەڭبەرىندە 14 كاسىپكەر جەڭىلدەتىلگەن نەسيەگە قول جەتكىزدى.