پرەزيدەنت قاسىم-جومارت توقايەۆ ەلىمىزدەگى نان مەن كومىردىڭ قىمباتتاۋىنا قاتىستى پىكىر ءبىلدىردى، – دەپ حابارلايدى Qamshy.kz اقپارات اگەنتتىگى
""الەۋمەتتىك" نان باعاسىنىڭ وسۋىنە بايلانىستى ۇكىمەت پەن اكىمدەرگە شۇعىل شارالار قابىلداپ، سۋبسيديالاۋدى قاراستىرۋ تاپسىرىلدى. كومىر بويىنشا دا وسىنداي تاپسىرما بەرىلدى. كومىر كومپانيالارىمەن كەلىسىپ، باعانى قولدان ءوسىرىپ وتىرعان دەلدالدارعا جول بەرىلمەۋى ءتيىس. باقىلاۋىمدا بولادى"، – دەپ جازدى پرەزيدەنت Twitter پاراقشاسىندا.
ەسكە سالساق، العاشقى بوپ الەۋمەتتىك نان پاۆلودار، كەيىن اقتوبەدە قىمباتتادى. ال اۋىل شارۋاشىلىعى مينيسترلىگىنىڭ جاۋاپتى حاتشىسى قازاقستاندا الەۋمەتتىك نان باعاسى وزگەرمەيدى دەپ ۋادە بەرگەن ەدى. وسى جاعدايدان كەيىن الماتىلىق ناۋبايحانالار دا ۇننىڭ قىمباتتاعانىن جانە استىقتىڭ تاپشىلىعىن ايتىپ، شاعىمدانعان بولاتىن.
پىكىر قالدىرۋ