«قازاق-قىتاي شەكاراسىن كەسىپ ءوتىپ، قازاقستانعا كەلگەن» شىڭجاڭ قازاقتارى مۇراگەر ءالىم ۇلى مەن قاستەر مۇساحان ۇلى ەكى ايعا قامالدى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. 

بۇل تۋرالى 21 قازاندا ولاردىڭ قورعاۋشىسى ءلاززات احاتوۆا حابارلادى. قورعاۋشىنىڭ سوزىنشە، ەكى جىگىتكە بۇلتارتپاۋ شاراسىن بەلگىلەيتىن سوت وتىرىسى دۇيسەنبى، 21 قازاندا ءوتۋى ءتيىس بولعان. الايدا بۇل سوت وتىرىسى اياق استىنان وزگەرىپ 20 قازاندا مەملەكەتتىك قورعاۋشىنىڭ قاتىسۋىمەن ءوتىپ كەتكەن.

– سوتتىڭ جەكسەنبى كۇنى تۇستە ءوتىپ كەتكەنىن ەستىپ، تاڭعالدىق. سوت ءتوراعاسى نياز حاسەنوۆپەن كەزدەسىپ، ءوز ءۋاجىمىزدى جەتكىزدىك. سوتتى وتكىزىپ، قاۋلى قابىلداعان دا سول كىسى ەكەن. ول كىسى بۇلتارتپاۋ شاراسى ادام قاماۋعا الىنعان ساعاتتان باستاپ 48 ساعات ىشىندە شەشىلۋى كەرەگىن، 18ء-ى كۇنى قاماۋعا الىنعان ءالىم ۇلى مەن مۇساحان ۇلىنىڭ ۋاقىتى كەشە كەشكى 18.00-دە اياقتالىپ جاتقاندىقتان، مەملەكەتتىك ادۆوكاتتىڭ قاتىسۋىمەن سوتتى وتكىزگەنىن ايتتى. بىزگە، ياعني ادۆوكاتتارىنا "ەسكەرتتىك" دەدى. ءبىراق ماعان ادۆوكات رەتىندە ەشكىم ەسكەرتكەن جوق. سوندىقتان وبلىستىق سوتقا اپپەلياسيالىق شاعىم ءتۇسىردىم، - دەدى ادۆوكات ءلاززات احاتوۆا ازاتتىققا.

قورعاۋشىنىڭ سوزىنشە، شەكارانى كەسىپ ءوتۋ اسا اۋىر قىلمىس ساناتىنا جاتپايتىندىقتان "ەكى ايعا قاماۋ - اۋىر جازا".

– سۋديانىڭ تەرگەۋ اياقتالعانعا دەيىن قولحاتپەن بوساتۋىنا، ءۇيقاماقتا بولۋى تۋرالى قاۋلى شىعارۋعا دا قۇقىعى بار ەدى، - دەيدى ادۆوكات. ءلاززات احاتوۆا ەرتەڭ تاڭرەتەڭ قورعاۋىنداعى ازاماتپەن كەزدەسەتىنىن ايتقان.

ال وسكەمەندەگى تەرگەۋ يزولياتورىنىڭ كەزەكتى قىزمەتكەرى "مەكەمەگە جەتكىزىلگەن ادامدار تۋرالى قاندايدا ءبىر اقپاراتتى تەك تۋىستارىنا جانە تەك مەكەمە رۇقساتىمەن عانا بەرە الاتىنىن" جەتكىزدى.

30 جاستاعى قاستەر مۇساحان ۇلى مەن 25 جاستاعى مۇراگەر ءالىم ۇلى ءدوربىلجىڭ ايماعىنان جولعا شىعىپ، 1 قازاندا جۇڭگو شەكاراسىنان وتكەندەرىن ايتقان. وزدەرىنىڭ ايتۋىنا قاراعاندا، قازاق-قىتاي شەكاراسى ارالىعىنداعى بەيتاراپ اۋماقتا بەس كۇندەي ءجۇرىپ، قازاننىڭ 6-سى كۇنى شىعىس قازاقسان وبلىسىنىڭ زايسان، شىلىكتى، ماڭىراق اۋىلدارىنىڭ تۇسىنان قازاقستانعا وتكەن. كەيىن جولاي تاكسي جالداپ، 10 قازاندا قازاندا الماتىعا "كەلگەن". 14 قازاندا الماتىداعى ادام قۇقىعىن قورعاۋ بيۋروسىندا وتكەن باسپا ءسوز ءماسليحاتىندا قاستەر مۇساحان ۇلى شىڭجاڭداعى لاگەردە قاماۋدا وتىرىپ شىققانىن، ال مۇراگەر ءالىم ۇلى سول جاقتا قىسىم كورگەنىن ايتقان. باسپا ءسوز ءماسليحاتىنان كەيىن ولاردى شەكارا قىزمەتىنىڭ وكىلدەرى الىپ كەتىپ، 15 قازاندا تەرگەۋ امالدارى ءۇشىن شىعىس قازاقستانعا جەتكىزىلگەن.

ۇقك شەكارا قىزمەتى قاستەر مۇساحان ۇلى مەن مۇراگەر ءالىم ۇلىنىڭ ۇستىنەن قىلمىستىق كودەكستىڭ 392-بابى 1 بولىگى، ياعني "قازاقستان شەكاراسىن زاڭسىز كەسىپ ءوتۋ" بابى بويىنشا تەرگەي ءجۇرىپ جاتقانىن حابارلاعان. ۇقك-نىڭ مالىمەتىنشە، قاستەر مۇساحان ۇلى بۇعان دەيىن 2006 جىلدىڭ 21 ماۋسىمىندا شەكارانىڭ قازاقستان جاعىنا ءوتىپ كەتىپ كەيىن قىتايعا قايتارىلعان. شەكارا قىزمەتى سول كەزدە ونىڭ جىلقى ۇرلاپ، قىلمىستىق جاۋاپكەرشىلىكتەن قاشىپ شەكارا بۇزعانىن ايتادى.