دامىعان قوعامنىڭ باستى بەلگىسى ەڭبەكشىلەر مۇددەسىنىڭ ەسكەرىلۋى دەسەك قاتەلەسە قويمايمىز. بۇل ورايدا كاسىپورىن مەن جۇمىسكەر اراسىنداعى ەڭبەك قاتىناسىن رەتتەۋشى ۇجىمدىق شارتپەن قامتۋ وزەكتى ماسەلە سانالادى. قازاقستان رەسپۋبليكاسى پرەزيدەنتى قاسىم-جومارت توقايەۆ تا ءوز جولداۋىندا ەڭ اۋەلى قاراپايىم ەڭبەك ادامدارىنىڭ جايىن ويلاپ، جاعدايىن جاساۋعا باسىمدىق بەرۋدى الەۋمەتتىك ساياساتتىڭ باستى باعدارىنا اينالدىرۋ قاجەتتىگىنە توقتالعان. سايكەسىنشە قازىرگى تاڭدا 4794 جامبىلدىق كاسىپورىندا ەڭبەكشى مەن ول قىزمەت ەتەتىن ۇيىم باسشىلىعى اراسىنداعى ەڭبەك داۋى ۇجىمدىق شارتتىڭ تالاپتارىنا ساي شەشىلىپ كەلەدى، دەپ جازادى Qamshy.kz اقپارات اگەنتتىگى. 

بۇگىندە وبلىس اۋماعىنداعى 4794 كاسىپورىن ۇجىمدىق شارتپەن قامتىلعان. بۇل ۇجىمدىق شارتپەن قامتىلعان زاڭدى تۇلعالاردىڭ 54،3 پايىزىن قۇرايدى.

–مۇنداعى 1567 كاسىپورىن مەملەكەتتىك مەنشىكتە. ونىڭ ىشىندە ءىرى جانە ورتا كاسىپورىندار ۇجىمدىق شارتپەن 100 پايىز قامتىلعان. ال شاعىن مەملەكەتتىك كاسىپورىندارداعى قامتۋ كورسەتكىشى 98 پايىزدى قۇرايدى.

سونداي-اق ۇجىمدىق شارتتارمەن بىرگە جۇمىسكەرلەردىڭ جۇمىستان قىسقارتىلۋىنا جانە ەڭبەك قۇقىقتارىنىڭ بۇزىلۋىنا جول بەرمەۋ ءۇشىن اكىمدىكتەر مەن كاسىپورىندار اراسىندا وندىرىستىك پروسەستەردى تۇراقتاندىرۋ ماسەلەلەرى بويىنشا وتكەن جىلى وبلىستا 8230 مەموراندۋم قابىلدادى. بۇل مەموراندۋمدار وبلىستا ارەكەت ەتىپ تۇرعان زاڭدى تۇلعالاردىڭ 93،2 پايىزىن قۇرايدى. 2019 جىلدىڭ 9 ايىندا 4980 مەموراندۋم قابىلداندى، –دەيدى وبلىس اكىمدىگى ەڭبەك ينسپەكسياسى باسقارماسىنىڭ باسشىسى بالابەك ناربايەۆ.

سونىمەن بىرگە باسقارما تاراپىنان جەكە جانە زاڭدى تۇلعالارعا ەڭبەك زاڭناماسىن ءتۇسىندىرۋ بويىنشا ادىستەمەلىك كومەكتەر دە كورسەتىلىپ، جۇمىسكەرلەردىڭ ەڭبەك زاڭدىلىقتارىن جەتىك بىلۋىنە ىقپال ەتۋ جۇمىستارىن ۇيىمداستىرۋ تۇراقتى جولعا قويىلعان. اتاپ ايتقان باسقارما ماماندارىمەن 1945 ادامعا ەڭبەك قاتىناستارى بويىنشا تۇسىندىرمە جۇمىستارى جۇرگىزىلسە، 945 لەكسيا وقىتىلپ، مەتوديكالىق كومەكتەر كورسەتىلدى.

–مۇنان بولەك قىزمەتكەر مەن جۇمىس بەرۋشى اراسىنداعى ەڭبەك قاتىناستارىنداعى ماسەلەنىڭ ەڭبەك ينسپەكتورلارىمەن تەكسەرۋ كەزىندە ەڭبەك زاڭناماسىن بۇزۋدىڭ 180 فاكتىسى انىقتالدى. سوعان ساي جۇمىس بەرۋشىلەرگە 77 نۇسقاما، 19 ەسكەرتۋ تۇرىندەگى اكىمشىلىك شارا جانە 34 ايىپپۇل سالىنعان. سالىنعان ايىپپۇلدىڭ كولەمى 5 ميلليون 226 مىڭ 750 تەڭگەنى قۇرايدى، –دەيدى وبلىس اكىمدىگى ەڭبەك ينسپەكسياسى باسقارماسىنىڭ باسشىسى بالابەك ناربايەۆ.