بىرنەشە رەت پارا الدى دەگەن كۇدىككە ىلىنگەن "قازاقستان تەمىر جولى – جۇك تاسىمالى" اق فيليالى التىنكول ستانساسىنىڭ باستىعى ج.ت.ۇنتاقبايەۆقا قاتىستى سوت ءىسىنىڭ قورتىندىسى شىقتى، – دەپ Qamshy.kz اقپارات اگەنتتىگى حابارلايدى.

سىبايلاس جەمقورلىققا قارسى ءىس-قيمىل اگەنتتىگى: "ول "التىنكول" كەدەن بەكەتىنىڭ باس مامانى ە.م.تولەيەۆپەن جانە تاۋار كاسساسىنىڭ باستىعى ا.م.ستامقۇلوۆامەن الدىن الا ءسوز بايلاسىپ، رادياسيالىق فونى جوعارى ۆاگونداردى كەدەرگىسىز وتكىزگەنى ءۇشىن 4 ملن 324 تەڭگە كولەمىندە پارا الدى دەگەن كۇدىككە ءىلىندى. سونداي-اق، ۇنتاقبايەۆ "التىنكول" ستانساسىنىڭ جۇك اۋدانىنىڭ باستىعى ت.پ.قالدىبايەۆتىڭ كومەك كورسەتۋىمەن ءىرى گاباريتتى ۆاگونداردى بەرگەنى ءۇشىن 1 ملن تەڭگەدەن استام سوما جانە جۇمىسقا ورنالاستىرعانى ءۇشىن ازاماتتان 100 مىڭ تەڭگە كولەمىندە پارا العان"، –  دەپ ءمالىم ەتتى.

الماتى وبلىسى پانفيلوۆ اۋداندىق سوتىنىڭ ۇكىمىمەن بىرنەشە رەت پارا العان ۇنتاقبايەۆ 8 جىلعا باس بوستاندىعىنان ايىرىلدى. سونداي-اق وسى ۇكىممەن تولەيەۆ پەن ستامقۇلوۆا 7 جىلعا، ال قالدىبايەۆ 2 جىلعا باس بوستاندىعىنان ايىرۋ جازاسىنا كەسىلدى. ودان وزگە سوتتالعاندار  ءومىر بويىنا مەملەكەتتىك قىزمەتتە لاۋازىمداردى يەلەنۋ قۇقىعىنان ايىرىلدى.