ءسات سايىن تۇرلەنىپ، توتىداي تارانعان تاراز قالاسىنىڭ ساۋلەتتىك كەلبەتىن جاقسارتۋدا وبلىس اكىمدىگىنىڭ ساۋلەت جانە قالا قۇرىلىسى باسقارماسىنا قاراستى ساۋلەتتىك بيۋرو مەكەمەسىنىڭ قوسقان ۇلەسى قوماقتى، دەپ جازادى Qamshy.kz اقپارات اگەنتتىگى. 

وتكەن جىلدىڭ ماۋسىم ايىندا اشىلعان مەكەمەنىڭ نەگىزگى مىندەتى تاراز قالاسىندا سالىناتىن نىسانداردىڭ نوبايىن سىزىپ، ماكەتىن دايىنداۋ بولىپ تابىلادى. ارحيتەكتۋرالىق بيۋرو ساۋلەتشىلەرى ازىرلەگەن نىسانداردىڭ نوبايلارى مەن ماكەتتەرى اپتا سايىن وبلىس اكىمىنىڭ ءتوراعالىق ەتۋىمەن وتەتىن قالا قۇرىلىسى كەڭەسىندە جان-جاقتى تالقىلىنادى. وسى تالقىلاۋدان وتكەن نىسانداردىڭ قۇرىلىسى ارى قاراي مەردىگەر كومپانيالارعا بەرىلەدى.

– بۇگىندە ساۋلەتتىك بيۋرودا 8 ساۋلەتشى جۇمىس جاسايدى. جۇمىسىمىزدى باستاعان 1 جارىم جىل ىشىندە قالاداعى قۇرىلىس نىسانداردىڭ بارلىعىنداعى كومپوزيسيالارعا ءبىزدىڭ ساۋلەتشىلەر ءوز ۇلەستەرىن قوسىپ ۇلگەردى. ماسەلەن بۇرىن «ماحاببات اللەياسى» اتالعان ساياباق «جاستار» اللەياسى بولىپ قايتا جاڭعىرتىلدى. قايرات رىسقۇلبەكوۆ ساياباعى كوركىنە كوز تويماس كورىكتى ورىنعا اينالدى. ساۋلەتتىك بيۋرو اللەياداعى ەسكى سۋبۇرقاقتاردى جاڭارتۋ جۇمىستارىن جوبالاۋمەن اينالىستى. سونداي-اق، ساياباقتا «ءبىلىم» «قاراحان ايشا ءبيبى» ستەللالارى ورناتىلدى. ءوز كەزەگىندە وسى نىسانداردىڭ بارلىعى دا ساۋلەتتىك بيۋرو مەكەمەسى ماماندارىنىڭ يدەياسىنان تۋىنداعان، –دەيدى ساۋلەتتىك بيۋرو ديرەكتورى ارمان ابدەشوۆ. ءقازىر ساۋلەتتىك بيۋرو ماماندارى ازىرلەگەن نوبايلار بويىنشا تاراز قالاسىنداعى 15 شاعىن اۋداندا وقۋشىلار سارايى، كونگرەسس-حولل، قارجى ورتالىعى، نەكە قيۋ سارايى، حالىققا قىزمەت كورسەتۋ ورتالىعى سەكىلدى الەۋمەتتىك نىساندارىنىڭ قۇرىلىسىن قولعا الۋ جۇمىستارى جۇرگىزىلۋدە.

ساۋلەتتىك بيۋرو ساۋلەتشىلەرىنىڭ ەندى ءبىر توبى «كونە تاراز» تاريحي-مادەني ارحەولوگيالىق پاركى اۋماعىنداعى تاريحي-مادەني ورتالىقتى ورتا عاسىرداعى ساۋلەتتىك ۇلگىمەن سالۋ ىسىنە جۇمىلدىرىلدى. بۇل ماقساتقا جەتۋ جولىندا ساۋلەتشى ماماندار ىرگەتاسى ورتاعاسىردا قالانعان سامارقاند، بۇقارا قالالارىندا بولىپ، ولارداعى قۇرىلىس جۇمىستارىنىڭ بارىسىمەن تانىسىپ تا قايتقان.

–بۇل كەشەننىڭ اۋماعىنداعى وبلىستىق ولكەتانۋ مۇراجايى، كوركەم سۋرەت گالەرەياسى، كورمە ورتالىعى، «رۋحانيات» ورتالىعى سىندى عيماراتتاردى سالىنىپ سىرتقى ارلەۋىندەگى ءاربىر ورنەكتىڭ ءاۋ باستاعى ساۋلەتتىك جوبادان اۋىتقىماۋىن باستى نازاردا ۇستايمىز، –دەيدى ساۋلەتتىك بيۋرو ديرەكتورى.