سۋ – تىرشىلىك كوزى. ونىڭ ادام ومىرىندەگى ماڭىزى بارشاعا ايان. سوندىقتان دا بۇگىندە ەلدى مەكەندەردىڭ اۋىز سۋمەن قامتىلۋى ماسەلەسى كۇن تارتىبىنە وتكىر قويىلۋدا. سايكەسىنشە جامبىل وبلىسىندا جىل سوڭىنا 209 ەلدى مەكەن تۇرعىندارى ورتالىقتاندىرىلعان اۋىز سۋدى پايدالانۋ مۇمكىندىگىنە يە بولادى. ناتيجەسىندەشى ءوڭىر تۇرعىنداردىڭ اۋىز سۋمەن قامتىلۋى كورسەتكىشى 56 پايىزعا جەتكىزىلمەك، دەپ جازادى Qamshy.kz اقپارات اگەنتتىگى. 

حالىقتى اۋىز سۋمەن قامتۋ ىسىندە ەلباسىنىڭ تاپسىرماسىنا ساي سۋمەن جابدىقتاۋ جانە سۋ بۇرۋ جۇيەلەرىن دامىتۋ جونىندەگى «2020 جىلعا دەيىن وڭىرلەردى دامىتۋ» باعدارلاماسى ىسكە اسىرىلۋدا. بۇگىندە وبلىس اۋماعىنداعى اۋىلدىق ەلدى مەكەندەردىڭ 53،3 پايىزى ورتالىقتاندىرىلعان اۋىز سۋمەن قامتىلعان. ال وڭىردەگى 4 قالا تۇرعىندارىنىڭ ورتالىقتاندىرىلعان سۋمەن قامتىلۋ كورسەتكىشى 88 پايىزدى قۇرادى.

بيىل بيۋدجەتتەن تاراز قالاسىنىڭ سۋمەن قامتۋ بويىنشا 2 جوباعا جالپى قۇنى 1 ميلليارد 775 ميلليون 200 مىڭ تەڭگە قاراستىرىلىپ وتىر. سونىمەن بىرگە اۋداندارداعى اۋىلدىق ەلدى مەكەندەردى سۋمەن قامتۋعا باعىتتالعان 16 جوباعا 5 ميلليارد 222 ميلليون 700 مىڭ تەڭگە قارجى بولىنگەن. مۇنان بولەك تارازدىقتاردىڭ اۋىز سۋمەن قامتىلۋ كورسەتكىشىن 100 پايىزعا جەتكىزۋ ءۇشىن 7 جوبا ازىرلەنىپ جاتىر. بۇل جوبالاردى ىسكە اسىرۋ ناتيجەسىندە تاراز قالاسى ماڭىنداعى «شالعاي قاراسۋ – 1،2،3،4،5،6،7»، «قاينار»، «ميچۋرينەس»، «اقجول»، «رودنيچوك»، «تەكتۇرماس»، «قاراساي»، «بارىسحان»، «ءشولدالا»، «قۇمشاعال»، «قىزىل اباد»، «كازارما»، «كولتوعان»، «جيدەلى» سىندى ساياجايلار مەن تۇرعىن القاپتارىنىڭ تۇرعىندارى ساپالى اۋىز سۋعا قول جەتكىزەدى. ال شۋ اۋدانىنداعى شۋ قالاسى بويىنشا قازىرگى تاڭدا 7 مىڭنان استام حالىق تۇراتىن «قوسقۇدىق» القابىنىڭ سۋمەن قامتۋ جۇيەلەرىنىڭ قۇرىلىس جوباسى ازىرلەنىپ، ساراپتاما قاراۋىنا تاپسىرىلىپ قويدى. قوسقۇدىقتىقتاردى سۋمەن قامتۋى كەرەك جوبانىڭ جالپى قۇنى 300-350 ميلليون تەڭگەنى قۇرايدى. جوبا تولىقتاي ىسكە اسىرىلعان جاعدايدا قالا تۇرعىندارىنىڭ 80 پايىزى ورتالىقتاندىرىلعان سۋ قۇبىر جۇيەسىنە قوسىلادى.

وبلىس ەلدى مەكەندەرىندەگى 8 جوبا بويىنشا قۇبىر تارتۋ جۇمىستارى ءوز مەجەسىنە جەتىپ تە قالدى. سول ارقىلى جىل سوڭىنا دەيىن بايزاق اۋدانىنداعى تالاس، سارىكەمەر، جۋالى اۋدانىنداعى قاراساز، تالاس اۋدانىنداعى قاسقابۇلاق، مايتوبە، سارىسۋ اۋدانىنداعى يگىلىك، ءوندىرىس، شۋ اۋدانىنداعى مويىنقۇم، مويىنقۇم اۋدانىنداعى قىلىشباي اۋىلدارى ساپالى سۋعا قولجەتكىزەدى. رەسپۋبليكالىق بيۋدجەت ارقىلى قارجىلاندىرىلىپ، قۇرىلىس جۇمىستارى وتكەن جىلى باستالعان قورداي اۋدانىنىڭ قاسىق، تالاس اۋدانىنىڭ ەسەيحان، سارىسۋ اۋدانىنىڭ ارىستاندى جانە قىزىلديحان، شۋ اۋدانىنىڭ اباي اۋىلدارىنىڭ تۇرعىندارىنا جىل سوڭىنا دەيىن ساپالى تىرشىلىك ءنارى قولجەتىمدى بولادى. سونىمەن قاتار، مويىنقۇم اۋدانىنداعى بۋرىلبايتال، ميرنىي، قياقتى ەلدى مەكەندەرىن سۋمەن قامتۋ جوبالارىن اياقتاۋعا 596 ميلليون 400 مىڭ تەڭگە قاراستىرىلدى. جوباعا ساي قۇبىر ارقىلى تۇرعىندار بالقاش كولىنىڭ تازارتىلعان اۋىز سۋىن قولدانباق.

بۇدان باسقا، سالالىق مينيسترلىككە 2020-2022 جىلدارداعى رەسپۋبليكالىق بيۋدجەتتەن قارجى بولۋگە 5 اۋداننىڭ 14 اۋىلدىق ەلدى مەكەنىنە جاڭا سۋ قۇبىر جۇيەلەرى قۇرىلىسىن سالۋ ءۇشىن 7 ميلليارد 90 ميلليون 200 مىڭ تەڭگەگە بيۋدجەتتىك وتىنىمدەرى وتىنىمدەر تاپسىرىلدى.

وبلىستا اۋىز سۋمەن قامتىلماعان ەلدى مەكەندەردى 2020-2022 جىلدارى اۋىز سۋمەن قامتۋ جوسپارىن حالىقارالىق قارجى ۇيىمدارى مەن مەملەكەتتىك-جەكەمەنشىك ارىپتەستىك اياسىندا ىسكە اسىرۋ مۇمكىندىكتەرى قاراستىرىلۋدا.