ماڭعىستاۋلىق اۋەس ساعىنايەۆا بالا كەزدەن كيىز باسىپ، كيىز ءۇي جابدىقتارىن جاساپ ۇيرەندى. قولىنان شىققان بۇيىمدارىنا كوپشىلىك قىزىعا قاراپ، تامساناتىن ەدى. وسى سالادا ارنايى، جوعارى ءبىلىم الماسا دا بىلگىرلەردەن ۇيرەنگەنى كوپ بولدى. تىنىمسىز ۇزاق جىلعى ەڭبەكتىڭ جەمىسى دە از بولمادى. مادەنيەت سالاسىنىڭ ۇزدىگى، قازاقستان قولونەر شەبەرلەرى وداعىنىڭ مۇشەسى، ماڭعىستاۋ وبلىسى قولونەر شەبەرلەرى وداعىنىڭ پرەزيدەنتى، «التىن ويماق» قولونەردى قولداۋ قورىنىڭ جەتەكشىسى.جاقىندا نۇر-سۇلتان قالاسىندا وتكەن قولونەر شەبەرلەرىنىڭ فورۋمىنا بارىپ، شەبەرلىك ساعاتىن وتكىزۋىنىڭ ءوزى ونىڭ ەلىمىز بويىنشا ايتۋلى مامان ەكەنىن اڭعارتسا كەرەك.

وبلىستىق مادەنيەت باسقارماسىنىڭ قولداۋىمەن، ماڭعىستاۋ اۋداندىق كاسىپكەرلەر پالاتاسىنىڭۇيىمداستىرۋىمەن اۋەس شەبەر العاش بولىپ شەبەرلىك ساعاتىن شەتپە اۋىلىنان باستادى. وعان اۋىلدىڭ 20 قىز-كەلىنشەگى قاتىسۋدا. قولونەرگە قىزىققان، الدا كاسىپ اشقىسى كەلەتىن نازىك جاندىلاردى ۇيرەتۋ تەگىن. بۇگىن ولار كەرەگە تاڭعىش توقىپ ۇيرەندى، كيىز باسىپ ماشىقتاندى. ماڭعىستاۋ وبلىسىندا ۇمىتىلىپ بارا جاتقان قازاقتىڭ ءداستۇرلى قول ونەرىن جاڭعىرتۋ جانە كاسىپكەرلىككە باۋلۋ اياسىندا وتكەن شاراعا  اۋەسساعىنايەۆامەن بىرگە ماڭعىستاۋ اۋدانىندا كيىز ءۇي جابدىقتارىن جاساۋ، ەسكى قولونەر بۇيىمدارىن قايتا جاڭعىرتۋمەن اينالىسىپ جۇرگەن «اسىل قازىنا» جەكە كاسىپكەرلىگىنىڭ باسشىسى كۇمىسقوسباي جانە وڭىرگە بەلگىلى كيىز ءۇي جابدىقتارىن، قازاقتىڭ قولونەرىن دامىتۋعا زور ۇلەس قوسىپ جۇرگەن شەبەر شارقاتتولەمىسوۆا دا قاتىستى. ۇيرەنگەندەرىنە ءدان ريزا بولعان قىز-كەلىنشەكتەر ماڭعىستاۋ اۋداندىق «اتامەكەن» ۇلتتىق كاسىپكەرلىك پالاتاسىنا شەكسىز العىسىن ءبىلدىردى.

جەكە كاسىپكەر جاننا امانقۇلوۆانىڭ ايتۋىنشا، اۋەس اپانىڭ وزىنەن قولونەر بۇيىمدارىنىڭ قىر-سىرىن ۇيرەنۋ ۇلكەن مارتەبە. ويتكەنى ماڭعىستاۋدا ودان وتكەن حاس شەبەر جوقتىڭ قاسى. ۇلتتىق ونەرىمىزدى ۇلىقتاپ، ونى ۇرپاقتان ۇرپاققا جەتكىزۋ ۇلكەن يگى ءىس.

«ۇلتتىق قولونەرىمىز مادەنيەتىمىزدىڭ، ءسالت-داستۇرىمىزدىڭ ءبىر بولىگى. ونى كەيىنگى ۇرپاققا مۇرا قىپ ۇيرەتىپ كەتۋ پارىزىمىز دەپ سانايمىز. ويتكەنى ساف ونەردى ءجىتى بىلەتىن شەبەرلەردىڭ جاسى 70ء-تى القىمداپ قالدى. بىلگەنىمىزدى، بويىمىزداعى شەبەرلىكتى جاستارعا ءسىڭىرىپ جاتقان جايىمىز بار. ءتۋريزمدى دامىتقىمىز كەلسە، مادەنيەتتى دە ۇمىتپاۋىمىز كەرەك. ەلگە كەلگەن تۋريست تاريح پەن مادەنيەتپەن تانىسقىسى كەلەدى. بىلتىر جاپونيالىق تۋريست قولونەر شەبەرلەرىن ارالاعىسى كەلدى. ەندى ارنايى ورتالىق قۇرىلسا قۇبا قۇپ»،- دەيدى شەبەر.

شەبەرلىك ساعاتىندا قاتىسۋشىلار تەكەمەت، الاشا توقۋ، كيىز باسۋ، باۋ-باسقۇر، كيىز ءۇي جابدىقتارىن توقۋدى ۇيرەنەتىن بولادى. شارا سوڭىندا ولارعا ارنايى سەرتيفيكاتتار تابىستالدى. ەندى ولار ءوز كاسىپتەرىن اشىپ، ۇلتتىق ونەرىمىزدى دارىپتەۋىنە بولادى.

اۋەس ساعىنايەۆا مۇنداي شەبەرلىك ساعاتتارىن ماڭعىستاۋدىڭ بارلىق اۋىلدارىندا وتكىزۋدى جوسپارلاپ وتىر.