العاشقى تۇتىنۋشىلارىن وسىدان 58 جىل بۇرىن قابىلداي باستاعان تاراز قالاسىنداعى «جامبىل» قوناق ۇيىندە ءار جىلدارى كەڭەس وداعىنا، كەيىننەن تاۋەلسىز قازاقستانعا تانىمال ازاماتتار ايالداعان. ولاردىڭ قاتارىندا بەلگىلى ساياساتكەرلەر مەن كينو جۇلدىزدار، ەسترادا انشىلەرى دە بار. قالا تاريحىمەن قاتار ورىلگەن قوناق ءۇي تاريحىنىڭ وسى ءبىر جارقىن ساتتەرىن ەستە ساقتاۋ ماقساتىندا وندا «كەڭەس كەزەڭدەگى «جامبىل» قوناق ءۇيى» اتتى مۇراجاي جۇمىس جاسايدى، دەپ جازادى Qamshy.kz اقپارات اگەنتتىگى.
بۇگىندە تۋريستەر اراسىندا تاريحي ورىندارعا دەگەن قىزىعۋشىلىق وتە جوعارى. اسىرەسە ول ورىنداردىڭ تاريحىندا اتى بەلگىلى تۇلعالار ءىز قالدىرسا وعان دەگەن قىزىعۋشىلىق تىپتەن ەسەلەنە تۇسەدى. ال تۇتىنۋشىلارىن قابىلداي باستاعان جارتى عاسىردان استام ۋاقىت ىشىندە «جامبىل» قوناق ءۇيى ءتۇرلى تاريحي كەزەڭدەردى باستان وتكەردى. ونىڭ العاشقى 30 جىلى كەڭەستىك داۋىرمەن تۇسپا-تۇس كەلدى. سوندىقتان مۇندا الىپ وداققا اتى بەلگىلى مەملەكەت جانە ونەر قايراتكەرلەرى، اقىن-جازۋشىلارىنا ۋاقىتشا مەكەن ەتتى.
مىنە وسىناۋ تاريحي ەرەكشەلىكتى قاز-قالپىندا ساقتاۋ ماقساتىندا قوناق ءۇيدىڭ ءبىر بولمەسىنە مۇراجاي ۇيىمداستىرىلدى. مۇراجايعا ەنگەن ساتتەن تۋريستەر كەڭەستىك داۋىرگە تاپ بولعانداي كۇي كەشەدى.كەڭەستىك جيھاز، ءتىپتى اسپالى شامعا دەيىن وتكەن عاسىردىڭ 60-جىلدارىنان حابار بەرەدى. توسەك ورىندارى مەن وزگە دە جابدىقتار جارتى عاسىر بۇرىنعى قاز-قالپىندا. مۇراجاي بولمەسىنە جەتكەنگە دەيىن كەز كەلگەن ادام قوناق ۇيگە ءار جىلدارى ورنالاسقان تانىمال ادامداردىڭ ءاتى-جونى جازىلعان تىزىممەن تانىسا الادى. بۇل تىزىمدە قازاقستان رەسپۋبليكاسىنىڭ تۇڭعىش پرەزيدەنتى-ەلباسى نۇرسۇلتان نازاربايەۆ تا بار.نۇرسۇلتان ءابىش ۇلى بۇل قوناق ءۇي بولمەسىندە قازاقكسر-نىڭ مينيسترلەر كابينەتىنىڭ ءتوراعاسى بولىپ تۇرعاندا وبلىسقا كەلگەن كەزەكتى ءىسساپارلارىنىڭ بىرىندە تۇرعان كورىنەدى.
تاريحي دەرەكتە «جامبىل» قوناق ءۇيى مەن بۇرىنعى كوك بازار ماڭىندا جامبىل ەسكەرتكىشى اقىننىڭ 115 جىلدىعىنا وراي ءبىر كۇندە پايدالانۋعا بەرىلگەنىن ايعاقتايدى. وسىلايشا بۇگىندە زاماناۋي ۇلگىدە جابدىقتالىپ وڭىرگە قىزمەت بابىمەن، ساياحاتتاۋ ماقساتىمەن كەلگەن كەز كەلگەن تالعامدى تۇتىنۋشىعا ساپالى قىزمەت كورسەتە الاتىن نىساندا سوناۋ كەڭەستىك داۋىردەگى تاراز تاريحىنان سىر شەرتەتىن مۇراجاي قىزمەت كورسەتۋدە.
پىكىر قالدىرۋ