تارازدا ءۇش جاستاعى تاستاندى بالاعا تەپەرىش كورسەتكەن تاربيەشىگە سوت ۇكىم كەستى دەپ حابارلايدى Qamshy.kz اقپارات اگەنتتىگى "استانا" تەلەارناسىنا سىلتەمە جاساپ.

54 جاستاعى كەلىنشەك ەندى ەكى جىل بويى پەداگوگيكالىق جۇمىس ىستەي المايدى. بۇدان بولەك مەملەكەت قازىناسىنا قوماقتى ايىپپۇل تولەمەك.

تاحمينا سۇلتانوۆا، جامبىل وبلىستىق كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ سۋدياسى: تاربيەشى ءوز كىناسىن تولىق مويىنداپ، تەرگەۋ ىسىنە كومەكتەستى.  سوت بارىسىندا وسى جاعى ەسكەرىلدى. سوندىقتان وعان 80 ايلىق ەسەپتىك كورسەتكىش كولەمىندە ايىپپۇل سالىندى. ونىڭ ەگدە جاسقا كەلۋى ەسكەرىلىپ، قالاداعى قوعامدىق جۇمىستارعا جەگىلمەيدى. ونىڭ ۇستىنە دەنساۋلىعى جارامايتىنى بەلگىلى بولدى.

ەسكە سالساق، 8ء-شى قازاندا «ءۇمىت» بوبەكتەر ءۇيى تاربيەشىسىنىڭ بالانى جازالاپ جاتقانى تاسپالانعان جازبا جەلىگە تاراپ كەتكەن ەدى. ارتى ۇلكەن داۋعا اينالىپ، قوعامنىڭ قىزۋ تالقىسىنا ءتۇستى. بەينەجازبادا 30 جىلدىق ءوتىلى بار مامان جىلاعان 3 جاستاعى بوبەكتى اياعىنان كوتەرگەن قالپى باسىن سالبىراتىپ، بىرنەشە رەت جۇلقىلايدى. وسىدان سوڭ تەكسەرىس باستالىپ، ول جۇمىسىنان ۋاقىتشا شەتتەتىلگەن ەدى. ەندى سوت ۇكىمىنەن كەيىن ول قىزمەتىنەن ءبىرجولاتا قۋىلماق. سونداي-اق، «ءۇمىت» بوبەكتەر ءۇيىنىڭ باسشىسى دا جازالانادى. سوت تارتىپتىك جازاعا تارتۋ ءۇشىن وبلىس اكىمدىگىنىڭ اتىنا جەكە قاۋلى شىعاردى. ايتا كەتەيىك،  اتالعان بالالار ۇيىندە تاعدىر تالكەگىنە تۇسكەن 64 تاستاندى تاربيەلەنىپ جاتىر.