ءتىس دارىگەرلەرى بالاعا بەرۋگە بولمايتىن تاعامداردى اتادى دەپ جازادى Qamshy.kz اقپارات اگەنتتىگى كتك تەلەارناسىنا سىلتەمە جاساپ.

ءتىس دارىگەرلەرى گازدالعان سۋسىن، قىتىرلاق كارتوپ، كەپتىرىلگەن ناندى بالالارعا بەرۋگە بولمايدى دەپ دابىل قاعۋدا. اتالمىش تاعامداردىڭ كەسىرىنەن الماتىداعى 15 جاسقا دەيىنگى بالالاردىڭ 90 پايىزىنىڭ تىسىنە قۇرت تۇسكەن. دەر كەزىندە ەمدەمەسە، بۋىنى بەكىمەگەن بالانىڭ جاق سۇيەگىنە دەيىن قيسايىپ ءتىسى وسپەي قالۋى مۇمكىن. ماماندار اۋىرىپ ەم ىزدەگەنشە، اۋىرمايتىن جول ىزدەۋگە كەڭەس بەرەدى.

الماتىداعى بالالار ءتىس ەمحاناسىندا اياق الىپ ءجۇرۋ مۇمكىن ەمەس. اسىرەسە كۇزگى كانيكۋلدا مۇندا كەلۋشىلەر سانى ءتىپتى كوبەيگەن. اتا-انالار دەمالىستى پايدالانىپ تاتتىگە قۇمار بالاسىنىڭ ءتىسىن قاراتىپ ءجۇر. سوڭعى ۋاقىتتا جەتكىنشەكتەر اراسىندا تىسجەگى اۋرۋى اسقىنىپ تۇر. ەمحاناعا كەلگەن 10 بالانىڭ توعىزىندا ءتىس قۇرتى بار.

راۋشان قوزىبەكوۆا، الماتى قالالىق بالالار ءتىس ەمحاناسىڭ دارىگەرى:  "بۇرىن كامپيت، قانت بولسا، ءقازىر تاتتىلەردىڭ ءتۇرى كوبەيىپ كەتتى. گازدالعان سۋسىن، قىتىرلاق نان، كارتوپ، چۋپاچۋپستى بالا اۋزىندا ۇزاق سورىپ جۇرەدى. بۇل وتە زيان. ەمحانادا ىستەگەنىمە 22 جىل بولدى. بۇرىنعى كەزبەن سالىستىرعاندا ءقازىر تىسجەگى وتە كوپ. بەس بالا كەلسە، سونىڭ بەسەۋىندە دە تىسجەگى بار".  

سوڭعى ۋاقىتتا تۋا ءبىتتى تاڭدايى جوق نەمەسە جىرىق ەرىن بولىپ تۋىلاتىن شاقالاقتار كوبەيگەن. ونداي سابيلەر پەرزەنتحانادان شىققان بويدا ەمحاناعا جەتكىزىلىپ، جاساندى تاڭداي سالىنادى. مۇنداي كەمىستىك بولماس ءۇشىن اناسى جۇكتىلىك كەزىندە كۇتىنىپ، دۇرىس تاماقتانۋى ءتيىس دەيدى دارىگەرلەر. ەمحانادا بارلىق ەم شارا تەگىن. قالاداعى جالعىز بالالار ءتىس ەمحاناسى 15 جاسقا دەيىنگى بارلىق بالانى اقىسىز ەمدەيدى.

ەلميرا شاكەموۆا، الماتى قالاسىنىڭ تۇرعىنى: "ۇيدە «جەمە» دەپ ايتامىز. مەكتەپ اراسىندا، ۇيگە قايتقان كەزدە ءبىزدىڭ كوزدى الا بەرە، سۋسىندار ءىشىپ، ءتۇرلى قىتىرلاقتاردى جەيدى. ۇيدە مۇقيات قاداعالايمىز. بالالاردىڭ دەنسۋلىعى – اتاانانىڭ مىندەتى".

ەمحانا بىلتىر جەكەمەنشىككە وتكەن. سول كەزدە بىلىكتى دارىگەرلەر جۇمىستان قۋىلىپ، بالالار ءتىس ەمحاناسى جابىلۋى مۇمكىن دەپ شۋ بولعان. الايدا جاڭا باسشى بۇرىنعى مامانداردىڭ ءبارىن قىزمەتىندە قالدىرىپتى. ەمحاناعا كەلەتىندەر سانىنىڭ كوبەيۋىنە بايلانىستى جۇمىس ۋاقىتى دا ۇزارعان.

تورەتاي رۋزيددينوۆ، الماتى قالالىق بالالار ءتىس ەمحاناسىنىڭ باس دارىگەرى: "ەمحانا ورتا ەسەپپەن العاندا كۇنىنە 200250 بالا قابىلدايدى. جىلىنا 73 مىڭداي بالا ەمدەلەدى. بالالار سانى ەش ازايعان جوق. كەرىسىنشە، بۇرىن 5 كۇن جۇمىس ىستەسە، ءقازىر 7 كۇن جۇمىس ىستەيمىز".

ماماندار بالانىڭ باسى اۋىرىپ ءتىسى سولقىلداعانىن كۇتپەي، دارىگەرگە جۇگىنۋ كەرەك دەيدى. ءسۇت تىستەرى ءتۇسىپ، تۇراقتى ءتىس شىققانشا جىلىنا ەكى مارتە دارىگەرگە قارالعان ابزال. ول ءۇشىن ۇزىن-سونار كەزەك كۇتپەي-اق، ۇيدە وتىرىپ ونلاين تىركەۋگە تۇرۋعا بولادى. ناۋقاستار اقىلى بولىمدە دە ەم-دوم قابىلداي الادى.