سانكت-پەتەربۋرگ ۇكىمەتىنىڭ مۇشەسى – ۇلتارالىق قاتىناستار جانە كوشى-قون ساياساتىن ىسكە اسىرۋ كوميتەتىنىڭ ءتوراعاسى ولەگ كاپيتانوۆ باستاعان رەسەيلىك دەلەگاسيا مادەني-ىسكەرلىك ميسسيامەن الماتىعا كەلدى، دەپ جازادى اكىمدىكتىڭ رەسمي سايتى.

دەلەگاسيانى الماتى اكىمى باقىتجان ساعىنتايەۆ قابىلدادى. ول ولەگ كاپيتانوۆپەن ەكى قالا اراسىنداعى قارىم-قاتىناستى دامىتۋ پەرسپەكتيۆالارىن تالقىلادى. تاراپتار دەنساۋلىق ساقتاۋ، ءبىلىم، تۋريزم، مادەنيەت جانە شوب سالالارىندا ىنتىماقتاستىقتىڭ «جول كارتاسىن» ازىرلەۋگە كەلىستى.

سونىمەن قاتار، دەلەگاسيا «الماتى-سانكت پەتەربۋرگ: جاڭا مۇمكىندىكتەر اۋماعى» كونفەرەنسياسىنا قاتىستى.

الماتى قالاسى اكىمىنىڭ ورىنباسارى ەرجان باباقۇماروۆ قۇتتىقتاۋ ءسوزىن ايتتى. ول مادەني شارانىڭ الماتى مەن سانكت-پەتەربۋرگ اراسىنداعى مادەني قارىم-قاتىناستى دامىتۋعا وڭ ىقپال ەتەتىنىن اتاپ ءوتتى.

– قازاقستان مەن رەسەيدى ماڭگىلىك دوستىق پەن باۋىرمالدىقتىڭ كەلىسىمشارتى بويىنشا ەجەلگى تاريحي ايرىقشا بايلانىس بىرىكتىرەدى. مەن ءبىزدىڭ ءوزارا قارىم-قاتىناسىمىزدى حالىقارالىق قاتىناستاردىڭ ۇزدىك ۇلگىسى رەتىندە باعالاۋعا بولادى دەپ ويلايمىن. الماتى مەن سانكت-پەتەربۋرگ كورشىلىك قارىم-قاتىناستى نىعايتۋدا ۇلكەن ءرول اتقارادى. ءبىزدىڭ ەكى قالامىز تاريحي تۇرعىدا بىرىنە–ءبىرى ۇقساس جانە شىن مانىندە ءوز ەلدەرىنىڭ مادەني جانە ىسكەرلىك ورتالىقتارى بولىپ سانالادى. ايتار بولساق، الماتى مەن سانكت-پەتەربۋرگ اراسىنداعى باۋىرمالدىق قاتىناسقا 20 جىلدان استام ۋاقىت ءوتتى. ءبىز بۇگىن ىنتىماقتاستىقتى ودان ءارى جالعاستىرۋعا جاڭا سەرپىن بەرەتىن بولامىز، – دەدى كونفەرەنسياعا قاتىسۋشىلارعا ارناعان قۇتتىقتاۋ سوزىندە الماتى قالاسى اكىمىنىڭ ورىنباسارى ەرجان باباقۇماروۆ.

الماتىداعى رەسەي فەدەراسياسىنىڭ باس كونسۋلى ەۆگەنيي بوبروۆ ە. باباقۇماروۆتىڭ سوزدەرىمەن تولىقتاي كەلىستى جانە قازاقستان مەن رەسەي بىرلەسكەن جۇمىستى ودان ءارى جانداندىرۋلارى ءتيىس دەپ تولىقتىردى.

–  مەن جاڭا عانا ايتىلعان ءسوزدى تولىق قۇپتايمىن، ءبىزدىڭ ەكى مەملەكەتىمىز تەك ستراتەگيالىق وداقتاستار عانا ەمەس، سونىمەن قاتار تەڭ تۇرعىداعى سەرىكتەستەر. راسىندا دا ءبىزدىڭ ورتاق ءارى وتە باي تاريحىمىز بار. ءبىزدىڭ باستى مىندەتىمىز اتا-بابالارىمىزدان قالعان بارلىق قۇندىلىقتاردى ساقتاپ قانا قويماي، ولاردى بايىتۋ جانە ءوزارا بايلانىسىمىزدى جاقسارتۋ، – دەدى الماتىداعى رەسەي فەدەراسياسىنىڭ باس كونسۋلى ەۆگەنيي بوبروۆ.

ول ءوزىنىڭ سوزىندە الماتى مەن سانكت-پەتەربۋرگ اراسىندا ۇقساستىقتىڭ كوپ ەكەنىن، ال رەسەي مەن الماتى اراسىنداعى ىنتىماقتاستىقتىڭ وتە تىعىزدىعىن اتاپ ءوتتى. 2018 جىلى رەسەي مەن الماتى اراسىنداعى تاۋار اينالىمى 4،7 ملرد. دوللاردى قۇراعان.

سانكت-پەتەربۋرگ ۇكىمەتىنىڭ مۇشەسى – ۇلتارالىق قاتىناستار جانە كوشى-قون ساياساتىن ىسكە اسىرۋ كوميتەتىنىڭ ءتوراعاسى ولەگ كاپيتانوۆ الماتى مەن سانكت-پەتەربۋرگتىڭ بىردەي تۇعىرلى الاڭدا تۇرعانىن اتاپ ءوتتى.

– ءبىزدىڭ دەلەگاسيانىڭ قۇرامىندا مادەني قاۋىمداستىقتىڭ، ءبىلىمنىڭ وكىلدەرى، بيزنەسمەندەر بار. الماتىعا سانكت-پەتەربۋرگتىڭ ەڭ وزىق كومپانيالارى كەلدى، ميسسيا تەك مادەني-تانىمدىق سيپاتقا عانا ەمەس، سونىمەن قاتار بيزنەستە، ءبىلىم مەن گۋمانيتارلىق جوبالاردا ۇزاق مەرزىمدى ءارى ەكى جاققا دا پايدالى شىنايى پراكتيكالىق بايلانىستاردى ورناتۋ، – دەپ اتاپ ءوتتى و. كاپيتانوۆ.

سانكت-پەتەربۋرگ ميسسياسىنىڭ دەلەگاتتارى الماتى اكىمىنىڭ كاسىبي باسقارمالارى باسشىلارىمەن ساۋدا-ەكونوميكالىق ىنتىماقتاستىق الەۋەتىن، ءوزارا بايلانىس پەن مەكتەپ جاسىنا دەيىنگى، جالپى، قوسىمشا جانە كاسىبي ءبىلىم بەرۋ جۇيەلەرىندەگى بىرلەسكەن جوبالاردى ىسكە اسىرۋدى تالقىلادى. بۇدان وزگە، كۇن تارتىبىنە گۋمانيتارلىق ىنتىماقتاستىقتىڭ، سونىڭ ىشىندە مادەنيەت جانە تۋريزم سالالارىنداعى سەرىكتەستىكتىڭ الەۋەتتى ماسەلەلەرى ەنگىزىلدى.

ميسسيا اياسىندا سانكت-پەتەربۋرگ تۋرالى ادەبيەتتى قازاقستان رەسپۋبليكاسىنىڭ ۇلتتىق كىتاپحاناسىنا سالتاناتتى تۇردە تاپسىرۋ ءراسىمى جانە «كۆينتەت چەتىرەح» مۋزىكالىق ۇجىمى مەن ماريينسك تەاترىنىڭ ءسوليسى لەونيد زاحوجايەۆتىڭ مەرەكەلىك كونسەرتى ءوتتى.