سوڭعى جىلدارى سارىسۋ اۋدانىندا ونەركاسىپپەن بىرگە اۋىلشارۋاشىلىعى دا سونى سەرپىنمەن دامىپ كەلەدى. اعىمداعى جىلدىڭ قاڭتار-قىركۇيەك ايلارىندا سارىسۋ اۋدانىنداعى اۋىل شارۋاشىلىق قۇرىلىمدارىمەن 9 ميلليارد 600 ميلليون تەڭگەنiڭ اۋىل شارۋاشىلىق ءونىمى وندىرىلگەن. بۇل 2018 جىلدىڭ 9 ايىمەن سالىستىرعان 1 ميلليارد 700 ميلليون تەڭگەگە ارتىق كورسەتكىش، دەپ جازادى Qamshy.kz اقپارات اگەنتتىگى. 

اتالعان كورسەتكىشتى سالالار بويىنشا تالدايتىن بولساق سارىسۋلىق ديقاندار تابىسى 5 ميلليارد 100 ميلليون تەڭگەنى قۇراعان. ال مال شارۋاشىلىعى سەكتورىنداعى تابىسقا 4 ميلليارد 500 ميلليون تەڭگە تيەسىلى.

بيىل اۋدانداعى ايدالعان جەردىڭ كولەمى 20 مىڭ 291 گەكتار بولسا ونداعى 4 مىڭ 587 گەكتار القاپقا جازدىق ماساقتى ءداندى داقىلدار ەگىلدى. سونداي-اق كوپ جىلدىق ءشوپ القابى 4 مىڭ 534 گەكتار. اۋداننىڭ جەر جاعدايى مەن كليماتى ماقسارى ەگۋگە قولايدى. سوندىقتان دا سارىسۋلىق شارۋالار اعىمداعى جىل بۇل داقىلدى 7 مىڭ 100 گەكتار القاپقا سەپكەن. مۇنان بولەك اۋدان ديقاندارى «دالا ارۋى» سانالاتىن جۇگەرى ەگۋگە كوپتەپ كوڭىل ءبولىپ جاتىر. بيىل سارىسۋداعى داندىك جۇگەرى 1 000 گەكتارعا ەگىلىپتى. 40 گەكتار جەرگە كارتوپ پەن 529 گەكتارعا كوكونىس پەن وزگە دە باقشا داقىلدارى ەككەن سارىسۋلىقتار ەگىس القاپتارىنىڭ كولەمى وتكەن جىلمەن سالىستىرعاندا 732،8 گەكتارعا ارتتىرۋعا قول جەتكىزگەن. ەگىس القاپتارىن ۇلعايتا وتىرىپ، ولاردا وزىق تەحنولوگيانى قولدانۋدىڭ دا وڭ تاجىريبەسى قالىپتاسقان. بيىل سۋ ۇنەمدەۋ تەحنولوگياسىن ەنگىزۋ جۇمىستارىنىڭ ناتيجەسىندە 75 گەكتار القاپقا تامشىلاتىپ سۋارۋ ءادىسى ەنگىزىلدى. بۇل جۇيەمە جاڭاتالاپتىق «جانتورە-ساۋداكەنت» جاۋاپكەرشىلىگى شەكتەۋلى سەرىكتەستىگىنىڭ كادەسىنە وڭتايلى جاراپ، سەرىكتەستىك 25 گەكتار القاپقا داندىك جۇگەرى جانە 35 گەكتار جەرگە پياز جانە 15 گەكتارعا باقشا داقىلدارىن ەگۋدە ءدال وسى تەحنولوگيانى قولدانعان.

قازىرگى كۇنى ايماقتاعى اگروقۇرىلىمداردىڭ مەنشىگىندە 1 315 دانا اۋىل شارۋاشىلىعى تەحنيكاسى بار. وندا 385 دانا تراكتور، 28 دانا كومباين، 902 دانا قوسالقى قۇرىلعىلار مەن تراكتور تىركەمەلەرى قىزمەت كورسەتەدى. سايكەسىنشە اۋدانداعى اۋىل شارۋاشىلىعى تەحنيكالارىنىڭ جاڭارتۋ ماسەلەسى ەشقاشان كۇنتارتىبىنەن تۇسكەن ەمەس. سوندىقتان دا «ساۋداكەنت كرەديتتىك سەرىكتەستىگى» جاۋاپكەرشىلىگى شەكتەۋلى سەرىكتەستىگىنىڭ كومەگىمەن 5 شارۋا قوجالىق 46 ميلليون 900 تەڭگە نەسيەگە قول جەتكىزدى. ءوز كەزەگىندە بۇل قارجىعا اگروقۇرىلىمدار 5 دانا بەلارۋس تراكتورى مەن 12 قوسالقى قۇرىلعىسىن ساتىپ الدى. ال «قازاگروقارجى» اكسيونەرلىك قوعامى ارقىلى ءبىرقاتار سارىسۋلىق شارۋا قوجالىقتارى جالپى كولەمى 66 ميلليون 800 مىڭ تەڭگە بولاتىن بىرنەشە اۋىل شارۋاشىلىق تەحنيكاسىن ساتىپ الدى. اۋدانداعى وزگە شارۋاشىلىقتار دا ءوز ەسەپتەرىنەن متز تراكتورى، «پرەسس-رۋلون» قۇرىلعىسى تىركەمە ۆاگون سىندى تەحنيكالارعا يەلىك ەتكەن.