"قازاقتىڭ ەركە قىزى" اتانعان حالىقتىڭ سۇيىكتى ءانشىسى، قازاقكونسەرت ءسوليسى ماقپال ءجۇنىسوۆانىڭ ماقپالداي داۋىسى تاشكەنت جۇرتشىلىعىن تامساندىردى دەپ حابارلايدى Qamshy.kz اقپارات اگەنتتىگى مادەنيەت جانە سپورت ءمينيسترلىنىڭ باسپا ءسوز قىزمەتىنە سىلتەمە جاساپ.
ەلىمىزدىڭ ۇلتتىق مۋزىكالىق مۇراسىن كەڭىنەن ناسيحاتتاۋعا زور ۇلەس قوسقان ماقپال ءجۇنىسوۆانىڭ كونسەرتى "تۋركيستون" كونسەرت زالىندا انشلاگپەن ءوتتى. كونسەرتتە ءانشىنىڭ بەلگىلى تۋىندىلارى، قازاقتىڭ حالىق اندەرى جانە تانىمال ورىس رومانستارى ورىندالدى. ءانشى قازاقكونسەرتتىڭ ونەر ۇجىمدارى - "استانا سازى" ەتنو-فولكلورلىق ءانسامبلى مەن "Saz&soul" ۆوكالدىق-اسپاپتىق ءانسامبلىنىڭ سۇيەمەلدەۋىمەن ونەر كورسەتتى.
انسامبلدەر بەلگىلى كومپوزيتورلار ءارى مۋلتي ينسترۋمەنتاليست مۋزىكانتتار باۋىرجان اقتايەۆ پەن ءادىلجان تولىقپايەۆتىڭ جەتەكشىلىگىمەن ساحناعا شىعىپ، قازاقتىڭ ءداستۇرلى مۋزىكاسى مەن ەسترادا ونەرىن ۇندەستىرگەن تاماشا سينتەزدىڭ ۇلگىسىن ۇسىندى. حالقىمىزدىڭ ۇلتتىق مۋزىكاسىن جاڭا فورماتتا ۇسىنعان انسامبلدەر تالعامپاز تىڭدارماننىڭ قۇلاق قۇرىشىن قاندىردى. بۇعان قوسا، تىڭدارمان قاۋىمعا ءوز ونەرىن بەلگىلى ءانشى ەرجان بەلعوزييەۆ پەن كونسەرتمەيستەر ولجاس بايدىلدايەۆ ۇسىندى.
وسى ايتۋلى جىلعا سايكەس قازاقكونسەرت ارتيستەرى تاشكەنتتە ەكى ۇلكەن كونسەرت بەرىپ ۇلگەردى. بۇدان از ۋاقىت بۇرىن تاشكەنتتڭڭ ءدال وسى "تۋركيستون" كونسەرت زالىندا قازاقكونسەرت ءسوليسى، بەلگىلى ءانشى روزا رىمبايەۆانىڭ كونسەرتى وتكەن بولاتىن.
ق ر مادەنيەت جانە سپورت مينيسترلىگىنىڭ قولداۋىمەن قازاقكونسەرت ۇسىنعان تىڭ جوبالار باۋىرلاس حالىقتاردى ودان ءارى جاقىنداستىرىپ، ەجەلدەن بەرى كەلە جاتقان ىنتىماعىمىزدى ودان ءارى جاراستىرا تۇسكەنى انىق.
گاسترولدىك ساپاردى ءساتتى وتكىزگەن قازاقكونسەرت ۇيىمىنىڭ ارتيستەرى تاعى ءبىر ۇلكەن جەتىستىككە قول جەتكىزدى. قازاقكونسەرت ۇيىمى وزبەكستان مەملەكەتتىك فيلارمونياسىمەن ىنتىماقتاستىق تۋرالى مەموراندۋم جاساستى. ەكى جاقتى مەموراندۋم شەڭبەرىندە ەكى ەلدىڭ مادەني قارىم-قاتىناسى ارتا تۇسەدى.
پىكىر قالدىرۋ