7 قاراشا كۇنى الماتىداعى رەسپۋبليكا سارايى جانىنداعى سكۆەردە قازاقتىڭ بەلگىلى كومپوزيتورى ءشامشى قالداياقوۆتىڭ قولادان جاسالعان ەسكەرتكىشى اشىلدى.

ەسكەرتكىشتىڭ اشىلۋ راسىمىنە زيالى قاۋىم وكىلدەرى، اقىندار مەن جازۋشىلار، مۋزىكانتتار مەن انشىلەر، ونىڭ ىشىندە مۇحتار شاحانوۆ، روزا رىمبايەۆا، كومپوزيتوردىڭ جەسىرى ءجاميلا قالداياقوۆا قاتىستى.

ەسكەرتكىشتى اشقان باقىتجان ساعىنتايەۆ ءشامشى قالداياقوۆ شىعارماشىلىعىمەن ءدۇيىم جۇرتتىڭ تانىس ەكەنىن اتاپ ءوتتى. ونىڭ اندەرىن كومپوزيتوردى «قازاق ءۆالسىنىڭ كورولى» اتاعان اعا ۇرپاق ەرەكشە ۇناتادى.

«بۇگىن ءبىز الماتىلىقتاردىڭ جاس ۇرپاعى جانە بارشا قازاقستاندىقتار ءۇشىن ونىڭ ەسىمىن ۇلىقتادىق. ءشامشى اعامىز ءوزىنىڭ اندەرىن جاستارعا دا، جاستاردىڭ ماحابباتىنا دا، دۋمانعا دا، ەل ابىرويىن اسقاقتاتاتىن جاعىنا دا ارناعان. ول اندەرىمەن ءار شاڭىراقتى تەربەتىپ قويعان جوق. بۇكىل قازاق جەرىن تەربەتتى. ەل تاۋەلسىزدىك العان سوڭ حالىق ءارتىسى اتاعىن الدى. ال ءبىراق حالقى ونىڭ اتاعىن ودان الدەقايدا بۇرىن بەرگەن. «قازاق ءۆالسىنىڭ كورولى» دەگەن. ونداي اتاققا جەتەتىن اتاق جوق. بۇل – ەلدىڭ، حالىقتىڭ سۇيسپەنشىلىگى»، – دەدى قالا اكىمى باقىتجان ساعىنتايەۆ.

سازگەردىڭ زايىبى مارقۇم كوزى تتىرىسىندە ءوزىن باقىتتى سەزىنگەنىن ايتتى. 

«بۇگىن سونداي قۇتتى كۇن. كەلىپ، باس ءيىپ قۇتتىقتاپ كەلگەندەرىڭىزگە راحمەت. ءشامشى قالداياقوۆ حالىقتىڭ سۇيگەن كومپوزيتورى، باقىتتى جان. ماعان «ءجاميلا، مەن وتە باقىتتى اداممىن، مەنى حالىق جاقسى كورەدى، بارعان جەرىمدە قۇرمەتتەيدى» دەپ ايتاتىن»، – دەدى ءجاميلا قالداياقوۆا.