رەسەي مەن قازاقستان شەكاراسىنداعى رەسەيلىك وتكىزۋ پۋنكتتەرىن قايتا قۇرۋ جانە جاڭارتۋ باعدارلاماسى 20 ميلليارد رۋبلگە (شامامەن 314 ميلليون دوللار) باعالانادى. بۇل تۋرالى رەسەيدىڭ ەكونوميكالىق دامۋ ءمينيسترى ماكسيم ورەشكين ومسك قالاسىندا وتكەن رەسەي مەن قازاقستان اراسىنداعى حVI ايماقارالىق ىنتىماقتاستىق فورۋمىندا مالىمدەدى.

ءمينسيردىڭ مالىمدەۋىنشە، قازىرگى ۋاقىتتا شەكارادا 49 شەكارا وتكىزۋ پۋنكتى جۇمىس ىستەسە، ولاردىڭ كوپشىلىگى شامادان تىس كەپتەلىستەردەن ارىلۋ ءۇشىن ينفراقۇرىلىمدى جاڭارتۋ قاجەت.

"باعدارلاما جاسالدى، العاشقى 18 وتكىزۋ پۋنكتى ءبىرىنشى كەزەڭگە ەنەدى. رەسەي تاراپىنان بۇل باعدارلامانى قارجىلاندىرۋ شامامەن 20 ميلليارد ءرۋبلدى قۇرايدى"، – دەدى ورەشكين.

ءمينيستردىڭ ايتۋىنشا، سوڭعى جىلدارى رەسەي مەن قازاقستان اراسىنداعى ءوزارا ساۋدا-ساتتىقتىڭ ءوسۋ قارقىنى ءبىرشاما باسەڭدەدى. مۇنىڭ ءبىر سەبەبى  – شەكارادان ءوتۋ كەزىندە وپەراتورلاردىڭ شىعىندارىنىڭ ارتۋى.

رەسەيلىك دەپارتامەنت ەكى ەلدىڭ جۇمىسىن ۇيلەستىرۋ قاجەت ەكەنىن باسا ايتادى.