تۇرعىن ءۇي سالاسىندا گەندەرلىك تەڭدىكتى جەتىلدىرۋ ماقساتىندا ايەلدەرگە ارنالعان يپوتەكا جوباسىن جۇزەگە اسىرۋ ءۇشىن "تۇرعىن ءۇي قۇرىلىس جيناق بانكى" "ازيا دامۋ بانكىمەن" بىرىگە وتىرىپ، شامامەن 4000 ايەلگە يپوتەكا بەرمەكشى - دەپ حابارلايدى، krisha.kz - كە سىلتەمە جاساپ.

"قازاقستاندا 9،1 ميلليون ايەل بار، ولاردىڭ 4،4 ميلليونى جۇمىسپەن قامتىلعان، جارتىسى ءوز وتباسىلارىن وزدەرى اسىراپ وتىر.

سونداي-اق ايەلدەردىڭ جالاقىسى ەرلەردىكىنە قاراعاندا ءۇش ەسەگە از ەكەنىن ەسكەرۋ كەرەك. ياعني ايەلدەردىڭ ەرلەرگە قاراعاندا پاتەر الۋ مۇمكىندىگى تومەن ەكەنىن بىلدىرەدى. سوندىقتان ءبىز "ازيا دامۋ بانكىمەن" بىرگە قازاقستاندىق ايەلدەردى قولداي وتىرىپ، گەندەرلىك جوبانى جۇزەگە اسىرماقشىمىز"، - دەدى  "تۇرعىن ءۇي قۇرىلىس جيناق بانكى" باسشىسى ءلاززات يبراگيموۆا.

بانكتەگىلەردىڭ ايتۋىنشا، يپوتەكا جوباسىنا جاڭا سالىنعان ۇيلەر دە، قايتالاما نارىقتاعى پاتەرلەر دە كىرەدى.

كرەديتتىڭ ماكسيمال سوماسى - 30 ميلليون تەڭگە. العاشقى جارنا - 15 پايىز. ءبىراق ول ايەلدىڭ جالاقىسى 200 مىڭ تەڭگەدەن كەم بولۋى ءتيىس. ەگەردە جالاقىسى 200 مىڭ تەڭگەدەن اساتىن بولسا، العاشقى جارنا - 20 پايىز. قازىرگى تاڭدا پايىزدىق مولشەرلەمەسى ءالى بەلگىسىز. ول تۋرالى كەيىنىرەك ايتىلادى.