تۇركىستان وبلىسىندا تۇرعىننىڭ ارىزىنان كەيىن اۋداندىق اۋرۋحانا دارىگەرلەرىنە قاتىستى قىلمىستىق ءىس قوزعالدى – دەپ Qamshy.kz اقپارات اگەنتتىگى حابارلايدى،  ktk تەلەارناسىنا سىلتەمە جاساپ.

27 جاستاعى دانا ءۇشىنشى بالاعا اياعى اۋىر ەكەنىن بىلگەندە تۇسىك جاساتپاق بولعان. ويتكەنى، ەكى بالاسىن كەسار تىلىگىن جاساتۋ ارقىلى بوسانعان. ال ءۇشىنشىسىن دۇنيەگە اكەلۋ دەنساۋلىعىنا ءقاۋىپتى بولعان. 

گينەكولوگ وعان تۇسىك تاستايتىن ءدارىنى 8 مىڭ تەڭگەگە ساتىپ، ەكى كۇن وتكەن سوڭ قايتا كەلۋ كەرەك ەكەنىن ايتقان. كەلىنشەكتىڭ ايتۋىنشا، قولىنداعى ەكى بالامەن بارعاندا، دارىگەر ەسكەرتپەستەن ابورت جاساعان.

"قاتتى اۋىردى، مەن جىلادىم. سوندا دا "شىدا" دەپ، 15 مينۋتتاي تازالادى. سانيتاركالار مەن قيمىلداماسىن دەپ ۇستاپ تۇردى. بالالارىم جىلاپ قاسىمدا بولدى"، – دەيدى دانا قۇرشانبەكوۆا.

جاتىرى مەن ىشەگىن جىرتقان سوڭ دا دارىگەر ايەلدى ۇيىنە قايتارىپ جىبەرگەن.

دانانىڭ ءىشى شىداتپاي اۋىرىپ، 3 كۇندە 3 رەت جەدەل جاردەممەن اۋرۋحاناعا بارعان. كەيىن 8 ساعات بويى وتا جاساپ، جاتىرىن الىپ تاستادى.

ءقازىر ايەلدىڭ ىشەگى سىرتىندا ءجۇر. تۇتىكشەلەر ورناتىلعان. دانانىڭ ايتۋىنشا، دارىگەرلەر دەنساۋلىعىن عانا ەمەس، تەكسەرۋشىلەرگە كورسەتەتىن مالىمەتتەردى دە بۇلدىرگەن.

"جالعان مالىمەت جازىپ قويعان. جۇكتى بولعانىمدى، تۇسىك جاساعانىن جازباعان. مەندە ونى دالەلدەيتىن ۋزي قاعاز بار"، – دەيدى كەلىنشەك.

اتالمىش وقيعادان كەيىن دارىگەر ءوز ەركىمەن جۇمىستان شىعىپ كەتكەن. دانانىڭ تۋىستارى ءتورت جارىم اي بۇرىن قۇزىرلى ورگاندارعا ارىز بەرگەن.

"ءىس قىلمىستىق كودەكستىڭ 317-بابى (مەديسينا جانە فارماسيەۆتيكا جۇمىسكەرىنىڭ تارتىپتىك مىندەتىن ءتيىستى ورىنداماۋ) بويىنشا تەكسەرىلىپ، قىلمىستىق ءىس قوزعالعان. ءقازىر قىلمىستىق ءىس بويىنشا ساراپتاما تاعايىندالدى"، – دەدى تۇركىستان وبلىسى پوليسيا دەپارتامەنتىنىڭ باسپا ءسوز حاتشىسى سالتانات قاراكوزوۆا.

وبلىستىق دەنساۋلىق ساقتاۋ باسقارماسى تەكسەرۋ جۇرگىزىپ، اسىق اتا اۋرۋحاناسىنىڭ ءبىرقاتار قىزمەتكەرى سوگىس العان.