پرەمەر-مينيسترىنىڭ ورىنباسارى بەردىبەك ساپاربايەۆ قوستاناي وبلىسىنىڭ تۇرعىندارىمەن كەزدەستى، – دەپ Qamshy.kz اقپارات اگەنتتىگى حابارلايدى.

ساپاربايەۆ ءبىلىم، دەنساۋلىق، ااك، بيزنەس، الەۋمەتتىك مەديسينالىق ساقتاندىرۋ سالالارىنا بولىنگەن قارجىلار جانە الداعى ۋاقىتتا اتقارىلاتىن جۇمىستار تۋرالى تولىعىراق ءتۇسىندىردى.

"ەگەمەندىك العالى ەلدىڭ ۇستانىپ كەلە جاتقان ساياساتى –  حالىقتىڭ ءال-اۋقاتىن جاقسارتۋ. سوعان بايلانىستى تۇكپىر-تۇكپىرىندە كاسىپورىندار اشىلىپ، جاڭا جۇمىس ورىندارى پايدا بولىپ، بالاباقشا مەن مەكتەپتەردىڭ سانى كوبەيۋدە. وزدەرىڭىز ەستىپ جاتقان بولارسىزدار، "حالىق دەنساۋلىعى تۋرالى" كودەكستىڭ جوباسى پارلامەنتتىڭ قاراۋىنا جىبەرىلدى. سوعان سايكەس، الداعى جىلدان باستاپ مەديسينالىق ساقتاندىرۋ جۇيەسى جۇمىس ىستەي باستايدى. قازىرگى قولدانىستاعى جۇيە بويىنشا تەگىن كورسەتىلەتىن قىزمەتتەر سول قالپى ساقتالىپ قالادى. ساقتاندىرۋ جۇيەسى قوسىمشا قىزمەتتەردى قامتيدى. جاڭا جۇيە بويىنشا حالىقتى دارى-دارمەكپەن قامتۋ، مەديسينالىق وڭالتۋ قىزمەتتەرى جەتىلە تۇسەدى. سونداي-اق 2025 جىلعا دەيىن بارلىق ەلدى مەكەندەردە ەڭ كەمىندە مەديسينالىق بەكەت نەمەسە ەمحانا بولۋى ءتيىس. مۇنان بولەك، اپاتتى جاعدايداعى بارلىق مەديسينالىق مەكەمەلەر جوندەلەدى ءارى ولاردىڭ ماتەريالدىق-تەحنيكالىق بازاسى حالىقارالىق تالاپتارعا سايكەستەندىرىلەدى. باسپانا الۋ ءۇشىن 10-15 جىل كەزەكتە تۇرۋدىڭ قاجەتى جوق. "نۇرلى جەر"، "7-20-25" مەملەكەتتىك باعدارلامالار ارقىلى پاتەر كىلتىن يەلەنۋگە بولادى. ءبىر سوزبەن ايتقاندا، ەڭبەكتەنىپ، لايىقتى ءومىر سۇرەمىن دەگەندەر ءۇشىن بارلىق جاعداي جاسالىپ جاتىر»، –  دەدى ول.

پرەمەر-مينيسترىنىڭ ورىنباسارىنىڭ ايتۋىنشا، ۇكىمەتتىڭ نەگىزگى مىندەتتەرىنىڭ ءبىرى –  ەكونوميكا قارقىنىن تومەندەتپەۋ.

سونداي-اق كەزدەسۋ بارىسىندا ساپاربايەۆ ءبىلىم سالاسىنا قاتىستى وزگەرىستەرگەدە  توقتالدى.

"2020 جىلى ۇستازداردىڭ جالاقىسى 30 پايىزعا كوتەرىلەدى. سونىمەن قاتار، ءقازىر 3 اۋىسىمدى مەكتەپتەر مەن اپاتتىق جاعدايدا دەپ تانىلعان وقۋ وشاقتارىنىڭ پروبلەمالارىن شەشۋگە كوڭىل ءبولىنىپ جاتىر. سوڭعى ۋاقىتتا جوعارى ءبىلىم ساپاسى اقساپ بارادى. ەل بويىنشا 132 ۋنيۆەرسيتەت بار. ءبىراق، بارلىعى بىردەي بىلىكتى كادرلاردى دايارلاي الماي جاتىر. ۇكىمەت كوميسسياسى وسى باعىتتا قىرۋار شارۋا اتقارۋدا. جۇكتەلگەن مىندەتتى ورىنداي المايتىن ۋنيۆەرسيتەتتەر مەن كوللەدجدەر قىسقارتىلۋى مۇمكىن"، -– دەپ پرەمەر-مينيسترىنىڭ ورىنباسارى ءسوزىن تۇيىندەدى.