ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا «ەلەكتروندىق ۇكىمەتتى» دامىتۋ جانە حالىقتىڭ سيفرلىق ساۋاتتىلىعىن ارتتىرۋ ماسەلەلەرى قارالدى. 

مەملەكەتتىك قىزمەتتەر تىزىلىمىنە 723 مەملەكەتتىك قىزمەت ەنگىزىلگەن، ولاردىڭ 580ء-ى نەمەسە 80% ەلەكتروندى فورماتتا، «ازاماتتارعا ارنالعان ۇكىمەت» مەملەكەتتىك كورپوراسياسى ارقىلى 648 قىزمەت نەمەسە قىزمەتتەردىڭ 89،6%-ى ۇسىنىلادى. 143 قىزمەت نەمەسە 19،8%-ى ازىرگە قاعاز فورماتىندا عانا قولجەتىمدى. 182 مەملەكەتتىك قىزمەت بويىنشا بيزنەس پروسەستەر وڭتايلاندىرىلعان، قۇجاتتاردىڭ ورتاشا سانى 30%-عا – 6-دان 4-كە، قىزمەت كورسەتۋدىڭ ورتاشا مەرزىمى 3 ەسە – 31-دەن 10 كۇنگە دەيىن قىسقارتىلعان. 2018 جىلمەن سالىستىرعاندا، كومپوزيتتىك مەملەكەتتىك قىزمەتتەردىڭ سانى 2 ەسەگە ارتقان.

2019 جىلدىڭ 10 ايىنىڭ قورىتىندىسى بويىنشا «eGov» پورتالىندا 10 ملن استام پايدالانۋشى تىركەلدى، 36،5 ملن قىزمەت الىندى (2018 جىلى – 27،5 ملن قىزمەت). «eGov mobile» جاڭا ءموبيلدى قوسىمشاسى ازىرلەندى. قوسىمشادا 31 قىزمەت پەن سەرۆيس ىسكە اسىرىلدى، وسى جىلدىڭ سوڭىنا دەيىن قوسىمشا 32 قىزمەتتى ىسكە اسىرۋ جوسپاردا بار.

2018 جىلدىڭ قورىتىندىسى بويىنشا سيفرلىق ساۋاتتىلىق دەڭگەيى 79،6% قۇرادى، جوسپارلانعان كورسەتكىش – 77%. بيىل 532 مىڭ ادام وقىتىلدى، جوسپار بويىنشا – 462 846 ادام.

«ازاماتتارعا ارنالعان ۇكىمەت» مەملەكەتتىك كورپوراسياسى قۇجاتتاردى قابىلداۋ جانە بەرۋ ءۇشىن قازپوشتانىڭ 1656 بولىمشەسى، 348 فرونت وفيس، 16 مامانداندىرىلعان، 17 كوشى-قون جانە 18 سيفرلىق حقكو ارقىلى مەملەكەتتىك قىزمەتتەردى ۇسىنادى.

«جىل سوڭىنا دەيىن مەملەكەتتىك قىزمەتتەردىڭ 80%-نا حالىق ينتەرنەت ارقىلى قول جەتكىزە الاتىن بولادى. ءبىزدىڭ الدىمىزدا كەلەسى جىلدىڭ سوڭىنا دەيىن وسى كورسەتكىشتى 90%-عا دەيىن جەتكىزۋ مىندەتى تۇر»، – دەدى ا. مامين.