بىرنەشە جىلعا سوزىلعان تۇيتكىلدى ماسەلە قالا اكىمى ب. ساعىنتايەۆتىڭ ارالاسۋىنان كەيىن شەشىلدى. بۇزىلاتىن ۋچاسكەلەردىڭ يەلەرى الماتى قالاسىنىڭ اكىمى باقىتجان ساعىنتايەۆقا جەتىسۋ اۋدانىنىڭ تۇرعىندارىمەن كەزدەسۋ كەزىندە كومەك سۇراپ، ءوتىنىش بىلدىرگەن ەدى.
سەيفۋللين داڭعىلى مەن جانسۇگىروۆ كوشەسىنىڭ قيىلىسىنداعى جول ايرىعى رەسپۋبليكالىق بيۋدجەت ەسەبىنەن سالىنىپ جاتىر. قالا اكىمى ب. ساعىنتايەۆ بيىلعى جىلدىڭ 29 قازانىندا مەملەكەت باسشىسى قاسىم-جومارت توقايەۆتىڭ قاتىسۋىمەن وتكەن كەڭەستە جول ايرىقتارىن سالۋ ءۇشىن الىناتىن ۋچاسكەلەرگە وتەماقى تولەۋ ماسەلەسىن كوتەرگەن ەدى.
بۇگىن قالالىق جەر قاتىناستارى باسقارماسىنىڭ باسشىسى ارداق سامامبەتوۆتىڭ ايتۋىنشا، سەيفۋللين داڭعىلى مەن جانسۇگىروۆ كوشەسىنىڭ قيىلىسىندا جولايرىعىن سالۋ ءۇشىن ونداعى جەردى ساتىپ الۋ ماسەلەسى 2017 جىلدان بەرى شەشىلمەي كەلگەن. قاراشا ايىندا رەسپۋبليكالىق بيۋدجەتتەن 3،5 ملرد. تەڭگە كولەمىندە قاراجات ءبولىنىپ، 117 ۋچاسكەنىڭ يەلەرىنە وتەماقى تولەۋ پروسەسى باستالدى. بۇگىندە ولاردىڭ بارلىعى ءتيىستى سوماسىن الدى.
– وسى كۇنگە دەيىن تۇرعىنداردىڭ جاعدايى بەلگىسىز بوپ كەلدى. ولار بۇل جەردى نە ساتا المايدى، نە كەتە المايدى. قالا اكىمى باقىتجان ساعىنتايەۆتىڭ ارقاسىندا ماسەلە وڭ شەشىمىن تاپتى. بۇگىن بۇزىلاتىن ۇيلەردىڭ يەلەرىمەن كوشۋدىڭ قالاي جۇرگىزىلەتىنىن تالقىلادىق، – دەدى الماتى جەر قاتىناستارى باسقارماسىنىڭ باسشىسى ا.سامامبەتوۆ.
جىلىتۋ ماۋسىمى مەن الداعى مەرەكەلەرگە بايلانىستى تۇرعىندارعا كەلەسى جىلدىڭ باسىندا كوشۋگە رۇقسات بەرىلدى.
سەيفۋللين داڭعىلى مەن جانسۇگىروۆ كوشەسىنىڭ قيىلىسىنداعى جول ايرىعىنىڭ قۇرىلىسى وسى ۋچاسكەدەگى كولىك جۇكتەمەسىن تومەندەتۋ ماقساتىندا جۇرگىزىلۋدە.
پىكىر قالدىرۋ