تاقىرىپتى تاپ وسىلاي قويۋىمىزدا قوپ-قويۋ سەبەپ بار: تارازداعى مەكتەپ دارەتحاناسىندا زورلانعان قىز وقيعاسى رەسپۋبليكادا ۇلكەن ءدۇمپۋ تۋدىردى. ال الماتى وبلىسىنداعى مەكتەپتەردە  جۇزدىكتى ءۇش ەسەلەگەن دالا «تۋالەتى» بار. سالدارىنان وبلىستا بالالار اراسىنداعى قىلمىس ءورشىپ تۇر.

انىعى – ايماقتاعى جاسوسپىرىمدەر اراسىنداعى زاڭبۇزۋشىلىق 4،3 پايىزعا ارتقان. بۇل باعىتتاعى جۇمىستىڭ سىلبىرلىعى سول، جۋىردا ىشكى ىستەر ءمينيسترى ەرلان تۇرعىمبايەۆ كامەلەتكە تولماعاندارعا قاتىستى زورلىق-زومبىلىق قىلمىستاردىڭ، سونداي-اق جاسوسپىرىمدەر بۇزاقىلىعىنىڭ الدىن الۋ بويىنشا كەڭەس وتكىزگەن بولاتىن. سوندا رەسپۋبليكاداعى قاتاڭ سىنعا قالعان ءتورت ايماقتىڭ ءبىرى رەتىندە الماتى وبلىسىن اتالعان ەدى.

ىلە-شالا تالدىقورعاندا دا بالالار قاۋىپسىزدىگىن قامتاماسىز ەتۋ جونىندە جيىن ءوتتى. ەندى وبلىستىق پوليسيا دەپارتامەنتىنىڭ باستىعى مۇرات ۇرۇمحانوۆتىڭ سول وتىرىستا ايتقان مالىمەتىن كەلتىرە كەتۋدى ءجون كوردىك.

– بيىلعى 10 ايدىڭ قورىتىندىسى بويىنشا وبلىستا جاسوسپىرىمدەر اراسىنداعى قىلمىس 4،3%-عا ارتتى. قۇقىق بۇزۋشىلىقتاردىڭ الدىن الۋ ماقساتىندا جەدەل-الدىن الۋ ءىس-شارالارى جەتى مارتە ۇيىمداستىرىلدى. اتاپ ايتقاندا، «ءجاسوسپىرىم» شاراسى 4 رەت، ال «تۇنگى قالاداعى بالالار» اكسياسى 3 مارتە وتكىزىلدى، – دەيدى پوليسيا گەنەرال-مايورى.

دەمەك، قوس پرەزيدەنتتىڭ بالالىعى وتكەن جەتىسۋدا شىن مانىندە جاسوسپىرىمدەر قاۋىپسىزدىگى الاڭداتارلىق دەڭگەيدە دەگەن ءسوز بۇل. ادەتتە كوپىرىپ: «ءۇش اۋىسىمدى مەكتەپتىڭ ماسەلەسىن شەشىپ جاتىرمىز» دەگەن وبلىستا، وكىنىشكە قاراي، ءۇش ءجۇز ءداراتحانانى مەكتەپ ىشىنە كىرگىزەردەي قاۋقار بولماي تۇر.    

وسى رەتتە، وبلىستىق ءبىلىم باسقارماسىنىڭ باسشىسى داۋرەن جۇنىسوۆكە حابارلاسقان ەدىك. الايدا جينالىستا وتىرعانىن العا تارتقان داۋرەن قابدولدان ۇلى ءبىزدىڭ كوڭىلىمىزدە سايراپ تۇرعان ءبۇتىن سۇراقتىڭ ەسەسىنە «وفيسيالنىي حات جىبەرىڭىز، جاۋاپ بەرىلەدى» دەپ ءبىر-اق اۋىز كەسىم ايتتى.

ءول، ءتىرىل: بالاڭىزدىڭ تاعدىرىنا قاتىستى سۇراق «وفيسيالنىي حات» دەگەن ەكى-اق اۋىز سوزدىك قۇنى جوق بولىپ تۇر. ويتپەسە، ءبىر بالانىڭ تاعدىرى وپات، ءيا تالكەك بولسا (قۇداي بەتىن ارى قىلسىن) بۇل جازعاندار سول حاتسىز-اق ءجۋرناليستىڭ الدىندا اپتىعىپ سويلەپ تۇرماس پا ەدى؟ شەكتەن شىعۋ ەمەي نە سىزشە؟!

بالكىم، بۇل سۇراققا وبلىسى سىنعا قالعان، «ءۇي يەسى» اماندىق باتالوۆتىڭ ءوزى جاۋاپ بەرەتىن بولار؟!

ايتا كەتەيىك، وبلىستا 760 مەكتەپتىڭ وقۋشىسىنا 182 پوليسيا ينسپەكتورى قارايدى. ءقازىر ايماقتاعى مەكتەپتەردە 15860 بەينەباقىلاۋ كامەراسى ورناتىلعان.

قوزىباي قۇرمان.

الماتى وبلىسى.