سەنات ءتورايىمى داريعا نازاربايەۆا وتاندىق بانكتەردىڭ پروبلەماسىن كوتەردى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ.
سەناتتىڭ بۇگىنگى وتىرىسىندا دەپۋتاتتار "ەۋرازيالىق ەكونوميكالىق وداققا مۇشە مەملەكەتتەردىڭ قارجى نارىعى سالاسىنداعى زاڭناماسىن ۇيلەستىرۋ تۋرالى كەلىسىمدى راتيفيكاسيالاۋ تۋرالى" زاڭ جوباسىن ماقۇلدادى. وسى ورايدا كەيبىر سەناتورلار ورتاق قارجى نارىعىندا وتاندىق بانكتەردىڭ قيىندىققا تاپ بولاتىنىن جەتكىزدى. سەبەبى ەلىمىزدىڭ قارجى ۇيىمدارى ءالى كۇنگە دەيىن مەملەكەتتىڭ كومەگىنە ءزارۋ. ال رەسەيلىك جانە حالىقارالىق قارجى ۇيىمدارى تەحنيكالىق جاعىنان مىقتى جانە زاماناۋي قارجى قۇرالدارىن قولدانىپ كەلەدى. ونداي باسەكەگە توتەپ بەرۋ وڭاي ەمەس.
سەنات ءتورايىمى داريعا نازاربايەۆا ءوز ارىپتەستەرىنىڭ پىكىرىنە قوسىلدى. ءبىراق باسەكە بولماسا، وتاندىق بانكتەر مەن نەسيە ۇيىمدارى وزگەرىسكە ۇمتىلمايدى.
"جالپى، باسەكەدەن قورىقپاۋ قاجەت. بۇگىندە "شەتەلدىك بانكتەر كەلىپ، وتاندىق بانكتەردى باسىپ الادى" دەگەن اڭگىمە ءوز بانكتەرىمىزدەن شىعىپ وتىر. سەبەبى ولار ءوز پوزيسيالارىن جوعالتىپ الامىز دەپ قورقادى. ءبىراق بۇگىندە قارجى سالاسىندا پروبلەما بار. ارزان اقشا الۋعا مۇمكىندىك جوق. سونىڭ سالدارىنان شاعىن جانە ورتا بيزنەس تۇنشىعىپ جاتىر. ال ءبىزدىڭ بانكتەر ول مىندەتتى شەشۋگە قاۋقارسىز"، - دەدى نازاربايەۆا.
ونىڭ ايتۋىنشا، وتاندىق بانكتەر باسقا قارجى ۇيىمدارىمەن باسەكەگە تۇسسە، ءوز شارتتارىن وزگەرتۋگە ءماجبۇر بولادى. بۇل – نارىق زامانىنىڭ تالابى.
