5 جىل ىشىندە تابيعي گاز ءوندىرۋ ورتاشا ەسەپپەن جىلىنا 6 پايىزعا، مۇناي ءوندىرۋ 2 پايىزعا وسكەن. گاز سالاسىنىڭ جىو-دەگى ۇلەسى 2030 جىلعا قاراي 3،6 پايىزعا دەيىن ۇلعايادى. بۇل تۋرالى energyprom ساراپشىلارىنىڭ زەرتتەۋىندە ايتىلادى.

مۇناي-گاز سالاسى – ق ر ەكونوميكاسىن دامىتۋدىڭ باستى درايۆەرلەرىنىڭ ءبىرى. اتالعان سالا سوڭعى ءۇش جىلدا ورتا ەسەپپەن 6،1%-عا وسكەن.

2019 جىلدىڭ ون ايىنىڭ قورىتىندىسى بويىنشا تابيعي گاز ءوندىرىسى 1،5%-عا ارتىپ، 46،3 ملرد تەكشە مەترگە جەتكەن. 2018 جىلى ءوندىرىس 55،5 ملرد تەكشە مەتردى قۇراعان. سوڭعى بەس جىلدا تابيعي گاز ءوندىرۋ جىلىنا ورتا ەسەپپەن 5،6%-عا ءوسىپ كەلەدى ەكەن.

ال گاز كوندەنساتىن قوسا العاندا، مۇناي ءوندىرۋ جىل باسىنان بەرگى ون ايدا 74،8 ملن توننانى قۇراپ، جىلدىق ءوسىم 0،3%-عا جەتكەن. 2018 جىلى ءوندىرىس كولەمى 90،4 ملن تونناعا جەتكەن بولاتىن. سوڭعى بەس جىلدا مۇناي ءوندىرۋ ورتاشا ەسەپپەن جىلىنا 2،1%-عا ءوسىپ جاتىر.

بۇگىندە گاز سالاسى مۇناي سەكتورىنا قاراعاندا جىلدام قارقىنمەن دامىپ كەلەتىنى بايقالادى. ءقازىردىڭ وزىندە جىو-دەگى گاز سالاسىنىڭ ۇلەسى 1،8%-عا جەتتى جانە ۇدايى ءوسىپ كەلەدى. سەكتوردا جالعاسىپ كەلە جاتقان ءوسىم جىو-دەگى ۇلەسىنىڭ 10 جىلدا 1،8%-دان 3،6%-عا دەيىن (2020-2030 جىلدار) ۇلعايۋىنا ىقپال ەتەدى.