بۇگىن، 21 جەلتوقساندا اقتوبە وبلىسىندا كولىكتەر جاپپاي سوقتىعىسىپ، 8 ادام اۋرۋحاناعا ءتۇستى. وقيعا سامارا - شىمكەنت تاس جولىنداعى حرومتاۋ قالاسىنىڭ ماڭىندا بولعان. بۇل تۋرالى اقتوبە وبلىستىق پوليسيا دەپارتامەنتىنىڭ باسپا ءسوز قىزمەتى حابارلادى.
دەپارتامەنتتىڭ حابارلاۋىنشا، حالىقارالىق تاس جولدىڭ 859-شى شاقىرىمىندا 11 كولىك جول اپاتىنا ۇشىراعان.
"مەرسەدەس" اۆتوكولىگىنىڭ جۇرگىزۋشىسى رۋلگە يە بولا الماي، قارسى باعىتتاعى "ۆاز-21115" كولىگىمەن سوقتىعىسقان. قاۋىپسىزدىك ءۇشىن پوليسيا بارلىق كولىكتىڭ جۇرۋىنە تىيىم سالدى. سول كەزدە حرومتاۋ قالاسىنان شىققان "Volvo" جۇك كولىگى جول جيەگىندە تۇرعان 9 كولىككە سوقتىعىسقان. جول-كولىك اپاتىنىڭ سالدارىنان 8 ادام حرومتاۋ اۋداندىق اۋرۋحاناسىنا جەتكىزىلدى" - دەپ حابارلادى وبلىستىق پوليسيا دەپارتامەنتىنىڭ باسپا ءسوز قىزمەتىنىڭ جەتەكشىسى ەربولات سارقۇلوۆ.
وسى جىلدىڭ 16 قىركۇيەگىندە سامارا-شىمكەنت تاس جولىنىڭ بويىندا اقتوبە وبلىسى بەسقوپا اۋىلىنىڭ ماڭىندا ەكى كولىك سوقتىعىسىپ، التى ادام قازا تاپقان ەدى.
پىكىر قالدىرۋ