بۇگىن، 21 جەلتوقساندا قازاقستان پرەزيدەنتى قاسىم-جومارت توقايەۆ بىرنەشە شەنەۋنىكتى قىزمەتىنەن اۋىستىرۋعا وكىم ەتتى. ونىڭ جارلىعى اقوردانىڭ رەسمي سايتىندا جاريالاندى.
پرەزيدەنتتىڭ وكىمىمەن رومان ۆاسيلەنكو قازاقستان سىرتقى ىستەر ءمينيسترىنىڭ ورىنباسارى قىزمەتىنەن، نۇرلان سەيتىموۆ قازاقستان سىرتقى ىستەر مينيسترلىگىنىڭ جاۋاپتى حاتشىسى قىزمەتىنەن بوساتىلدى. اقوردا سىرتقى ىستەر مينيسترلىگىنىڭ قوس قىزمەتكەرىنىڭ قىزمەتىنەن بوساتىلۋىن باسقا جۇمىسقا اۋسۋىنا بايلانىستى دەپ حابارلادى.
كەيىن اقوردا توقايەۆتىڭ رومان ۆاسيلەنكونى قازاقستاننىڭ سلوۆاكياداعى ەلشىسى قىزمەتىنە، نۇرلان سەيتىموۆتى قازاقستاننىڭ ەستونياداعى ەلشىسى قىزمەتىنە تاعايىنداعانى تۋرالى جارلىعىن جاريالادى.
بۇعان قوسا، توقايەۆ ەلدىڭ سينگاپۋرداعى ەلشىسى اركەن ارىستانوۆقا قازاقستاننىڭ جاڭا زەلاندياداعى ەلشىسى قىزمەتىن، ەلدىڭ ۆەتنامداعى ەلشىسى ەرلان بايجانوۆقا قازاقستاننىڭ كامبودجاداعى، لاوستاعى توتەنشە جانە وكىلەتتى ەلشىسى قىزمەتىن قوسا اتقارۋدى جۇكتەدى.
18 جەلتوقساندا دا پرەزيدەنت توقايەۆ بيلىكتە ءبىرقاتار كادرلىق وزگەرىس جاساعان ەدى. ول كەزدە توقايەۆتىڭ جارلىعىمەن قانات بوزىمبايەۆ ەنەرگەتيكا ءمينيسترى قىزمەتىنەن بوساتىلىپ، پرەزيدەنت كومەكشىسى بولىپ تاعايىندالدى. پرەزيدەنت بوزىمابايەۆتىڭ ورنىنا اتىراۋ وبلىسىنىڭ اكىمى نۇرلان نوعايەۆتى تاعايىنداپ، اتىراۋ وبلىسىنا اكىم ەتىپ بۇعان دەيىن ەنەرگەتيكا ءمينيسترىنىڭ ورىنباسارى قىزمەتىن اتقارىپ كەلگەن 59 جاستاعى ماحامبەت دوسمۇحامبەتوۆتى جىبەردى. ال شىلدە ايىنان بەرى پرەزيدەنت كومەكشىسى مىندەتىن اتقارعان ماۋلەن اشىمبايەۆ دارحان كالەتايەۆتىڭ ورنىنا پرەزيدەنت اكىمشىلىگى جەتەكشىسىنىڭ ءبىرىنشى ورىنباسارى بولىپ تاعايىندالدى. كالەتايەۆتىڭ قانداي قىزمەتكە تاعايىندالعانى ازىرگە بەلگىسىز. سونىمەن قاتار، ءمادينا ءابىلقاسىموۆا ۇلتتىق بانك ءتوراعاسىنىڭ ورىنباسارى قىزمەتىنەن بوساپ، جاڭادان قۇرىلعان قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى بولىپ تاعايىندالدى. ول ناۋرىز ايىنان بەرى ۇلتتىق بانك ءتوراعاسىنىڭ ورىنباسارى بولعان. بۇعان قوسا، توقايەۆ 2017 جىلدان بەرى قازاقستاننىڭ رەسەيدەگى ەلشىلىگىن باسقارىپ كەلە جاتقان يمانعالي تاسماعامبەتوۆ زەينەت جاسىنا تولۋىنا بايلانىستى قىزمەتىنەن بوساتتى.
پىكىر قالدىرۋ