بۇگىن الماتى وبلىسى اقسۋ اۋداندىق سوتىندا جۇڭگو ەلىنىڭ جۇمىسشىلارىن سوققىعا جىقتى دەپ ايىپتالعان قىزىلاعاشتىڭ بەس تۇرعىنىنا قاتىستى كەزەكتى سوت وتىرىسى تاعى دا كەيىنگە قالدىرىلدى، دەپ جازادى سوت وتىرىسىنا قاتىسقان Qamshy.kz اقپارات اگەنتتىگىنىڭ ءتىلشىسى.

قىزىلاعاشتىڭ 5 تۇرعىنى سوت باستالماس بۇرىن ادىلدىك ىزدەيتىندەرىن ايتتى. الايدا سوت وتىرىسى تاعى دا شەگەرىلدى. ويتكەنى وتىرىسقا جابىرلەنۋشى تاراپ  – قىتايلىق جۇمىسشىلار كەلمەدى. جابىرلەنۋشىلەردىڭ تاراپىنان تەك اۆتوبۋس يەسى مەن پوليسيا قىزمەتكەرى كەلدى.

قامالعان جىگىتتەردى قولداۋعا كەلگەن جۋرناليست رىسبەك سارسەنبايدىڭ ايتۋىنشا، ارىز تۇسىرۋشىلەردى سوت وتىرىسىنا كەلمەۋى – زاڭدى سىيلامايتىندارىنىڭ كورىنىسى.

– ولار كەلۋى كەرەك ەدى. ولاردىڭ كومپانياسىنىڭ ورتالىعى جاقىن ماڭدا ورنالاسقان. جول تايعاق بولسا دا قانشاما ادام كەلىپ، سوتقا قاتىسىپ وتىر. ولار نە جەتە المادى ما؟ بۇل –  زاڭدى سىيلامايتىندارىنىڭ كورىنىسى، –  دەپ نارازىلىعىن ءبىلدىردى.

ال ادۆوكات جانار بالعابايەۆا "شەتەلدىكتەرمەن توبەلەستى" دەپ ايىپتالعان قىزىلاعاشتىڭ بەس ازاماتى پروكۋرورمەن پروسەسسۋالدىق كەلىسىم جاساسقانى تۋرالى ايتتى.

وسىلايشا، كەشىگىپ باستاعانىمەن قويماي اينالاسى بەس مينۋتقا جەتپەي توقتاتىلعان سوت وتىرىسىنان سوڭ شامامەن 500-گە جۋىق ادام ءوز نارازىلىقتارىن ءبىلدىردى. اۋەلى "بوستاندىق!" دەپ ۇرانداپ، ارتىنشا سەڭدەي قوزعالىپ، بەس جىگىتتى اكەتۋگە دايىن تۇرعان كولىكتىڭ جولىن بوگەدى. 

قارا ءنوپىر حالىق نارازىلىعىن تاراتۋ ءۇشىن "كاسكا" كيىپ، قالقان ۇستاعان ارنايى جاساق كەلسە دە اشىنعان جۇرت رايىنان قايتپادى. ولاردىڭ تالابى – سوت پروسەسىن سوزباي، بەس جىگىتتى بوستاندىققا شىعارۋ.

وسى رەتتە، قوعام قايراتكەرى رىسبەك سارسەنباي پوليسەيلەردىڭ كولىگىنىڭ ۇستىنە شىعىپ، حالىقتى سابىرعا شاقىردى: 

– باۋىرلارىم، ءسال سابىر ەتىڭىزدەر! اقىل كەرەك. ءبىز حالىقپىز، وسىنشا ادام جينالىپ تۇرعانىنا ءبىز ريزامىز. ەل بار، قازاق دەگەن حالىق بار ەلدىڭ نامىسىن قورعايتىن. بەس باتىر بولسا، بەس باتىردىڭ ارتىندا بەس مىڭ، بەس ءجۇز مىڭ، بەس ميلليون حالىق بار. بيلىكتىڭ كوزىن جەتكىزدىك ءبىز. ءقازىر ءسال سابىر ەتىڭىزدەر. زاڭ بار، ءتارتىپ بار. تارتىپكە باعىنۋىمىز كەرەك. مەن سىزدەردىڭ اتتارىڭىزدان تالاپ قويدىم. سوت پروسەسسىن سوزباسىن. سۋديا ەرتەڭگە قالدىرىپ وتىر، سوعان كەلىسپەي وتىرمىز. سولاي عوي؟ سوندىقتان، ءبىزدىڭ تالابىمىز، سوت پروسەسسىن قايتا باستاسىن. ءقازىر ءبىز قايتادان ءوتىنىش جاسايمىز. جىگىتتەردى ەركىندىككە كەپىل ارقىلى، نە بولماسا قولحات ارقىلى، نە بولماسا ءۇيقاماق ارقىلى بوستاندىققا شىعارۋىن تالاپ ەتەمىز. جابىرلەنۋشىلەردى كەلتىرسىن. سوت پروسەسىن قىسقارتسىن، – دەدى رىسبەك سارسەنباي.

بۇدان سوڭ اۋداندىق پروكۋروردىڭ ورىنباسارى ادىلەت اسقار ۇلى ءسوز الىپ:

– جەرلەستەر، بارلىقتارىڭىز بىلەسىزدەر. جاڭا ەستىدىڭىزدەر، سوت پروسەسىن ەرتەڭگە قالدىرۋعا كەلىسىلدى. ۋاقىت كەرەك. ەرتەڭ ۇشتەگى سوت پروسەسىننەن سوڭ جىگىتتەر سوت زالىنان بوساتىلادى. سوندىقتان، رىسبەك اعا ايتقانداي، زاڭعا باعىنايىق، قوعامدىق ءتارتىپتى بۇزبايىق. شىدامدىلىق تانىتايىق، كەلىستىك پە؟ ءبىزدى دە تۇسىنىڭىزدەر. ەرتەڭ ساعات ۇشتە پروسەستىك كەلىسىم بەكىتىلگەننەن كەيىن جىگىتتەر سوت زالىنان بوساتىلادى، – دەدى.

ەسكە سالا كەتسەك، بيىل 8 قازاندا الماتى وبلىسى اقسۋ اۋدانى قىزىلاعاش اۋىلىنىڭ تۇرعىندارى جۇڭگو ازاماتتارىن سوققىعا جىققانى تۋرالى حابارلانعان بولاتىن. وعان سەبەپ، "Citic Construction" كومپانياسىندا جۇمىس ىستەيتىن قازاق-قىتاي جۇمىسشىلارى اراسىنداعى قاقتىعىس-تىن. قىتايلىق جۇمىسشىلاردىڭ ارىزى بويىنشا قىزىلاعاش اۋىلىنىڭ تۇرعىندارى بەرىكبول رىسالدينوۆ، اعايىندى بەيبىت جانە نۇربول مۇحمەتالين، ەركىن مەن سارقىت سالحانوۆتار ۇستالعان. ولار قاساقانا دەنە جاراقاتىن كەلتىرگەنى ءۇشىن ايىپتالۋدا.