بۇل تۋرالى ەكى وقىلىمدا ماقۇلدانعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق، قىلمىستىق-پروسەستىك زاڭنامانى جەتىلدىرۋ جانە جەكە ادام قۇقىقتارىنىڭ قورعالۋىن كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىندا قاراستىرىلدى دەپ حابارلايدى «Qamshy.kz» اقپارات اگەنتتىگى.  

مال ۇرلىعىنا قاتىستى زاڭنىڭ قاتايعانى سونشالىق،  تالقىعا تۇسكەن قىلمىستىق كودەكس جوباسىندا مال ۇرلىعى دەگەن جەكە باپ ەنگىزىلمەك. باس پروكۋروردىڭ ورىنباسارى مارات احمەتجانوۆتىڭ ايتۋىنشا، ءقازىر اتالعان ۇرلىق ءتۇرى كاسىپكە اينالۋدا.

«بىرىنشىدەن، مال ۇرلىعى دەگەن جەكە باپ ەنگىزىلمەك. ول قىلمىس ءۇشىن باسقا ۇرلىق تۇرلەرىنە قاراعاندا جازا قاتال بولماق. جالپى، بۇل نورمانىڭ ماڭىزى زور. ءتورت تۇلىككە قول سۇعۋ – اۋىل ادامىن كۇنكورىس كوزىنەن ايىرۋمەن بىردەي. وسىعان توسقاۋىل كەرەك. ءقازىر مال ۇرلاۋ كاسىپكە اينالعان»، – دەدى مارات احمەتجانوۆ.

وسى رەتتە، باس پروكۋروردىڭ ورىنباسارى بۇل ساناتتا تەرىس قىلىق پەن ورتاشا اۋىر قىلمىس دەگەن بولمايتىنىن دا اتاپ ءوتتى. ماسەلەن، زاڭ جوباسىندا جاي قۇرام ءۇشىن 5 جىلعا دەيىن باس بوستاندىعىنان ايىرۋ ەسكەرىلسە، ەگەر توپ بولىپ الدىن الا ءسوز بايلاسىپ، ءىرى مولشەردە ۇرلىق جاساسا – 7 جىلعا دەيىن سوتتالادى. ال بىرنەشە رەت مال قوراعا، قويماعا بۇزىپ كىرگەنى ءۇشىن – 10 جىل. اسا ءىرى كولەمدە جانە قىلمىستىق توپ بولىپ ۇرلىق جاساسا، 12 جىل باس بوستاندىعىنان ايىرۋ كوزدەلگەن.

ەسكە سالا كەتەيىك، پرەزيدەنت قاسىم-جومارت توقايەۆ ءوز جولداۋىندا قىلمىسقا قارسى كۇرەستى كۇشەيتۋدى تاپسىرعان بولاتىن. اسىرەسە، ادام ءولتىرۋ، زورلاۋ، پەدوفيليا، مار ۇرلىعى، براكونەرلىك، ەسىرتكى تاراتۋعا، ماس كۇيىندە كولىك باسقارۋعا جازانى قاتايتۋ جونىندە ايتقان.