بۇل تۋرالى «Qamshy.kz» اقپارات اگەنتتىگى «قازاقپارات» دەرەگىن نەگىزگە الا وتىرىپ حابارلايدى.

تاتارستاندىق عالىمداردىڭ ايتۋىنشا، ءتورت تۇلىك مالدىڭ ىشىندە قامبار اتا تۇلىگىنىڭ ەتىن تاڭداۋعا وسى ازىق ءتۇرىن ءسۇيىپ جەيتىن تاتار حالقىنىڭ ءداستۇرى سەبەپ بولعان.

«ەت جاساۋ ءۇشىن بيوپسيا كومەگىمەن قۇلىننان بۇلشىق ەت ۇلپاسىنىڭ ۇلگىلەرىن الامىز. ويتكەنى قۇلىننىڭ ەتىندە بىزگە قاجەت باعانالىق جاسۋشا كوپ. سوسىن بيولوگيالىق ماتەريالدى ارنايى ينكۋباتورعا سالامىز. بۇل تەحنيكا دۇرىس تەمپەراتۋرالىق رەجيم مەن اتموسفەرا قۇرامىن قامتاماسىز ەتەدى، سونداي-اق جاسۋشالاردىڭ وسۋىنە قاجەتتى تاعامدىق زاتتاردى جەتكىزەدى»، – دەيدى ArtMeat كومپانياسىنىڭ باس ديرەكتورى اسقار لاتىشيەۆ.

ال 3D Bioprinting Solutions كومپانياسى قۇرىلتايشىلارىنىڭ باسقارۋشى سەرىكتەسى يۋسەف حەسۋانيدىڭ پىكىرىنشە، كەلەشەكتە كۇندەلىكتى تۇتىنۋعا ارنالعان ارزان ەت وندىرۋگە مۇمكىندىك بار. ۋاقىتى كەلگەندە ەتتىڭ بۇل ءتۇرى قىمبات رەستوران مەن دۇكەندەردە پايدا بولۋى مۇمكىن.

«2014 جىلى وسىرىلگەن جاسۋشانىڭ كيلوگرامى $1 ملن بولسا، ءقازىر ول $1،5 مىڭعا دەيىن ءتۇستى. ءبىراق بۇل ءونىم رەستورانعا دەيىن جەتۋى ءۇشىن ونى تاعى 100 ەسە ارزانداتۋ كەرەك، ياعني $15 دەيىن. مەنىڭ ويىمشا، بۇل ابدەن مۇمكىن»، – دەيدى يۋسەف حەسۋاني.

سونىمەن بىرگە، عالىمدار جاساندى جىلقى ەتىن وندىرۋدەگى ارتىقشىلىقتاردى دا اتاپ وتكەن. ماسەلەن، ولار مۇنداي دايىن ءونىم الۋ ءۇشىن انتيبيوتوك جانە باسقا دا ادام دەنساۋلىعىنا زيان پرەپاراتتار قولدانىلمايتىنىن، ءتىپتى، ۆيرۋستار مەن باكتەريالاردان قورعالىپ، قۇنارى ساقتالىپ وسىرىلەتىنىن ايتادى.

ناتيجەسىندە، قولدان جاسالعان ەت پەن كادىمگى جىلقى ەتىنىڭ دامىندە ايىرماشىلىق بولمايدى دەيدى ولار.

اتاپ وتەرلىگى، ArtMeat وسىرگەن العاشقى فارش شامامەن ءۇش جىلدان كەيىن دايىن بولماق. ءقازىر الەمدە ەت ءوسىرۋ تەحنولوگياسىن دامىتىپ جاتقان 30-عا جۋىق جوبا بار.