بۇل تۋرالى "Qozǵalys KZ" جاستار قوعامدىق قوزعالىسىنىڭ ءتوراعاسى اسلان كاباگەنوۆ ءوزىنىڭ facebook-تاعى پاراقشاسىندا حابارلادى.

"دوستىق ۇيىندە قالالىق حالىق تىڭدالىمى ءوتتى. بۇل جيىندا قاراستىرىلعان ماسەلە – قاراعاندى قالاسىنداعى 10 كوشەنىڭ اتاۋىن اۋىستىرۋ تۋرالى، ونىڭ ىشىندە، قازاق حالقىنىڭ ماڭدايىنا بىتكەن ءبىرتۋار تۇلعالارى – اباي قۇنانباي ۇلى، قاسىم امانجولوۆ، الەكساندر زاتايەۆيچ، قازىبەك نۇرجانوۆ، ت.ب. اتاۋلارىمەن وزگەرتىلدى. "جۇمىلا كوتەرگەن جۇك جەڭىل" دەمەكشى، قوعامنىڭ اتىنان ءبىر اۋىز شەشىم قابىلداندى. بۇل تىڭدالىم قاراعاندى قالالىق ءماسليحاتىنىڭ حاتشىسى – قۇدايبەرگەن بەكسۇلتان ۇلى بەكسۇلتانوۆتىڭ توراعالىعىمەن ءوتتى. كوشە اتاۋلارىن اۋىستىرۋداعى باستى ماقسات – ەلىمىزدىڭ تاريحى، مادەنيەتى، ادەبيەتى جاعىنان دامىتۋعا ۇلەس قوسقان ۇلى تۇلعالاردى دارىپتەۋ، سونىمەن قاتار جاستاردىڭ، بولاشاق ۇرپاقتىڭ تۋعان جەرىن، تۋىپ-وسكەن ولكەسىن ناسيحاتتاپ، وتانىمەن ماقتان تۇتۋعا، ءوز ەلىنىڭ تاريحي جەرلەرىن ۇنەمى ەستە ساقتاپ جۇرۋگە تاربيلەۋ بولىپ تابىلادى. ەڭ باستىسى – ۇلى اقىن، فيلوسوف، قازاق ادەبيەتىنىڭ پايعامبارى اباي قۇنانباي ۇلىنىڭ اتىنا كوشە اتاۋىن بەرۋ – ۇلتىمىزدىڭ رۋحىن ارتتىرادى دەگەن سەنىمدەمىز. تىڭدالىمنىڭ سوڭى اباي اتامىزدىڭ "كوزىمنىڭ قاراسى" ءانىن تەبىرەنىسپەن ايتقان حالىقتىڭ پاتريوتتىق سەزىمىنىڭ ارتۋىنا ۇلكەن سەپتىگىن تيگىزۋىمەن اياقتالدى" دەلىنگەن جازبادا.

جيىنعا قاتىسقان جەرگىلىكتى كاسىپكەر ەرجان ءاشىموۆ "كاسىپكەر رەتىندە قانشاما قاراجاتتى سالىققا تولەپ وتىرعان اداممىن، ەگەر قاجەت بولسا وسى كوشە اتاۋلارىنا كەتەتىن قاراجاتتى مەن تولەپ بەرەيىن"، دەپ ۇسىنىس تاستاعان.