فۋتبولدان تۇركيا قۇراماسىنىڭ بۇرىنعى ويىنشىسى، 2002 جىلعى الەم چەمپيوناتىنىڭ قولا جۇلدەگەرى حاكان شۇكىر تۇركيا ۇكىمەتىمەن بولعان كەلىسپەۋشىلىكتىڭ كەسىرىنەن جۇمىسسىز قالىپ، اقش استاناسى ۆاشينگتوندا تاكسي جۇرگىزىپ ءجۇر.
Eurosport.ru سايتىنىڭ جازۋىنشا، ەكس-فۋتبولشىنىڭ بانكتەگى شوتتارى بۇعاتتالعان. الەم چەمپوناتىنداعى ەڭ جىلدام گولدىڭ اۆتورىنا قىسىم ونىڭ ساياسي كوزقاراسى ءۇشىن جاسالعان.
حاكان شۇكىر بىرنەشە جىل بۇرىن پرەزيدەنت ەردوعاننىڭ پارتياسىنا كىرگەن. الايدا پارتياداعى جەمقورلىق پەن جۇمىستى جۇرگىزۋ ءتاسىلى ۇناماعاندىقتان ودان شىعىپ كەتكەن.
وسىدان كەيىن ەكس-فۋتبولشى وتانىندا قىسىم كورە باستاعان. بانكتەگى شوتتارى بۇعاتتالعان. بيلىك تاراپىنان تەپەرىش توقتاماعان سوڭ ول 2015 جىلى وتباسىمەن اقش-قا كوشىپ كەتۋگە ءماجبۇر بولعان.
2016 جىلى حاكان شۇكىر مەملەكەتتىك توڭكەرىس جاساماق بولعاندارعا قاتىسى بار دەپ ايىپتالدى. وعان حالىقارالىق ىزدەۋ جاريالانىپ، اكەسى تۇرمەگە قامالدى. الايدا اكەسى قاتەرلى ىسىككە شالدىققاندىقتان، ۇزاماي بوستاندىققا شىعارىلدى.
تۇركيا بيلىگى فۋتبولشىعا اقش-تا دا تىنىشتىق بەرمەگەن. ءوزىنىڭ سوزىنشە، پاتەرىن جالعا بەرەيىن دەسە، جالعا الۋشىلارعا تيىسە مە دەپ قاۋىپتەنەدى. اقش-تا اشقان كافەسىن بەلگىسىز بىرەۋلەر بۇلدىرگەننەن كەيىن امالسىز جاپقان.
"مەنىڭ جۇمىس ىستەۋىمنىڭ سەبەبى – مەندە ەشتەڭە قالمادى. ەردوعان مەنەن بوستاندىعىمنان باستاپ، وي ەركىندىگىن، ەڭبەك ەتۋ قۇقىعىمدى الىپ قويدى. ولار مەنىڭ ايەلىمنىڭ دۇكەنىنە تاس لاقتىردى، مەنىڭ بالالارىما كوشەدە قوقان-لوققى جاسالدى، مەن ءاربىر جاساعان ۇندەۋىمنەن كەيىن قورقىتۋ-ۇركىتۋ ارەكەتتەرىنە تاپ بولدىم. مەن ەلدەن كەتكەندە ولار اكەمدى تۇتقىندادى. وسى ۋاقىتقا دەيىن جيناعان بار دۇنيە-مۇلكىمدى تاركىلەدى. بۇل مەنىڭ وتباسىما اۋىر سوقتى. مەنىڭ اينالامداعى بارلىق ادامدار قارجىدان تارشىلىق كورىپ كەلەدى" - دەيدى حاكان "رەكورد" باسىلىمىنا بەرگەن سۇحباتىندا.
"بوسفور بۇقاسى" لاقاپ اتىمەن تانىمال ەكس-فۋتبولشى "گالاتاساراي"، "ينتەر" جانە "پارما" كلۋبتارىندا ويناعان. تۇركيا قۇراماسى ساپىندا 100-دەن استام ويىن وتكىزگەن. 2002 جىلعى الەم چەمپيوناتىندا قولا جۇلدەگەر اتانعان. سول جارىستاعى ءۇشىنشى ورىن ءۇشىن بولعان ويىندا كورەيا قۇراماسىنىڭ قاقپاسىنا 11 سەكۋندتا گول سوعىپ، چەمپيوناتتاعى ەڭ جىلدام گول يەسى اتانعان.
