قازاقستاندا مال ەكسپورتىنا تىيىم سالىندى. بۇل تۋرالى بۇگىن، 20 قاڭتاردا ەلدىڭ اۋىل شارۋاشىلىعى مينيسترلىگى حابارلادى. 

مينيسترلىكتىڭ مالىمدەۋىنشە، مال ەكسپورتىنا تىيىم سالۋعا ەت باعاسىنىڭ قىمباتتاۋى سەبەپ بولعان.

- مالدىڭ جاپپاي ەكسپورتتالۋى ەت باعاسىن ءوسىردى. شيكىزات تاپشىلىعىنان قازاقستاننىڭ ەت كاسىپورىندارى مەن بورداقىلاۋ الاڭدارى تولىق جۇمىس ىستەي المادى. ولاردىڭ تولىق جۇمىس ىستەمەۋىنىڭ نەگىزگى سەبەبى مالدىڭ جاپپاي ەكسپورتىنىڭ سالدارىنان شيكىزات تاپشىلىعى بولدى، - دەلىنگەن مينيسترلىك حابارلاماسىندا. 

مينيسترلىكتىڭ مالىمەتىنشە، وتكەن جىلى قازاقستاننان شەتەلگە 156 مىڭ باس ءىرى قارا مال شىعارىلدى. ولاردىڭ باسىم كوپشىلىگى – 78 پايىزى وزبەكستانعا، 14 پايىزى ارمەنياعا ەكسپورتتالعان.

ال ۇساق مالداردان ەلدەن 264 مىڭ باس قوي شىعارىلعان، ونىڭ جارتىسىنان استامى انالىق باس. ۇساق مالدىڭ باسىم بولىگى، ياعني 200 مىڭنان استامى (76%) وزبەكستانعا، 21،5 مىڭ باس (8،1%) رەسەيگە، 18 مىڭ باس (6،7%) ازەربايجانعا جانە شامامەن 12 مىڭ باس (4،5%) يرانعا تاسىمالدانعان.

اۋىل شارۋاشىلىعى مينيسترلىگى مال ەكسپورتىنا تىيىمدى اگرو ونەركاسىپ كەشەنىن دامىتۋدىڭ 2017 - 2021 جىلدارعا ارنالعان مەملەكەتتىك باعدارلاماسىمەن بايلانىستىرادى. بۇل باعدارلاما بويىنشا قايتا وڭدەلگەن ءونىم ەكسپورتى 2،5 ەسەگە ۇلعايۋى ءتيىس.

قازاقستاندا 2019 جىلى 21 قازاندا دا مال ەكسپورتتاۋعا شەكتەۋ قويۋ تۋرالى بۇيىرىق شىققان. ول كەزدە تەك انالىق مال باسىن ەكسپورتتاۋعا ۋاقىتشا تىيىم سالىنعان ەدى. مينيسترلىكتىڭ حابارلاۋىنشا، سول شەكتەۋ قۇجاتىنا جاڭا وزگەرىستەر ەنىپ،  ەندى بارلىق ءىرى قارا جانە ۇساق مالدار جاسى مەن جىنىسىنا قاراماستان شەتەلگە تاسىمالدانبايدى. 

"اتالعان بۇيرىققا وزگەرىستەر ەنگىزۋ تاياۋ جىلدارى قازاقستاندا مال باسىن ساقتاپ، ۇلعايتۋعا، وتاندىق ەت كومبيناتتارىن قولايلى باعامەن، ساپالى شيكىزاتپەن قامتاماسىز ەتۋگە جانە دايىن وڭدەلگەن ءونىمنىڭ ءوندىرىسى مەن ەكسپورتىن ارتتىرۋعا مۇمكىندىك بەرەدى" دەيدى اۋىل شارۋاشىلىعى مينيسترلىگى.