قازاقستان پرەزيدەنتى قاسىم-جومارت توقايەۆتىڭ جارلىعىمەن ءابىلقايىر ىسقاقوۆ پاۆلودار وبلىسىنىڭ اكىمى بولىپ تاعايىندالدى. بۇل تۋرالى اقوردا سايتى 21 قاڭتاردا حابارلادى. بۇعان دەيىن پاۆلودار وبلىسىنىڭ اكىمى بولعان بولات باقاۋوۆ پرەزيدەنت جارلىعىمەن قىزمەتىنەن بوساتىلدى.
46 جاستاعى ءابىلقايىر ىسقاقوۆ 2019 جىلدىڭ ءساۋىر ايىنان بەرى قارجى مينيسترلىگىندە قارجىلىق باقىلاۋ كوميتەتىنىڭ ءتوراعاسى بولعان. وعان دەيىن ول نۇر-سۇلتاندا مەملەكەتتىك كىرىستەر دەپارتامەنتىن باسقارعان. كوبىنە قارجى، سالىق سالاسىندا قىزمەت ەتكەن. ىسقاقوۆ پاۆلودار وبلىسىنىڭ تۋماسى.
2016 جىلىدىڭ ناۋرىز ايىنان بەرى پاۆلودار وبلىسىنىڭ اكىمى بولعان بولات باقاۋوۆ 17 قاڭتاردا “جەمقورلىق كۇدىگىمەن” ەكى ايعا قاماۋعا الىنعان. وعان قىزمەتىن اسىرا پايدالانۋ بابى بويىنشا ايىپ تاعىلعان. وعان بۇلتارتپاس شاراسىن قولدانۋ تۋرالى وتكەن سوتتا باقاۋوۆتىڭ قىزمەتىن اسىرا پايدالانىپ، تۋىسقانىنىڭ كومپانياسىنىڭ زاڭ بۇزعانىن جاسىرۋ ءۇشىن سالىق ورگاندارىنا قىسىم جاساعانى ايتىلدى. باقاۋوۆ بۇل ايىپتاردى مويىنداعان جوق.
پىكىر قالدىرۋ