مۇنداي پىكىردى ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ جەتەكشى عىلىمي قىزمەتكەرى الماس ارزىقۇلوۆ ءبىلدىردى، دەپ حابارلايدى قازاقپارات

 

«سوڭعى كەزدە ارمەنيا، قىرعىزستان، بەلارۋس، رەسەيدە تىركەۋدە تۇرعانىمەن ەلىمىزدە جۇرگەن كولىكتەرگە قاتىستى كەلەڭسىز جاعداي تۋىنداعان بولاتىن. الدىمەن ىشكى ىستەر مينيسترلىگى مۇنداي كولىكتەردىڭ ەلىمىزدە جۇرۋىنە تىيىم سالىناتىندىعىن نەمەسە جۇرۋىنە 1 جىل عانا رۇقسات بەرىلەتىندىگىن ايتتى. ال بۇگىن پرەزيدەنت 1 اقپانعا دەيىن ەلىمىزگە كىرگەن مۇنداي كولىكتەر ۋاقىتشا تىركەۋگە الۋدى جانە ونى شەشۋدى ىشكى ىستەر مينيسترلىگىنە تاپسىردى. ءبىراق، بۇل ۋاقىتشا عانا شەشىم. ۋاقىتشا تىركەۋ كەلەسى جىلدىڭ 1 ناۋرىزىنا دەيىن عانا. وسى ۋاقىتقا دەيىن بارلىق كولىك يەسى مەملەكەتكە تولەنەتىن تولەمدەرىن تولەپ، كولىكتەرىن قازاقستاندىق تىركەۋگە وتكىزۋى كەرەك. تىركەمەسە كولىگىن اكەلگەن جاعىنا جەتكىزۋى ءتيىس»، - دەدى ساراپشى.

 

ونىڭ اتاپ وتۋىنشە، بۇگىندە ەلىمىزدە 170 مىڭعا تارتا شەتەلدىك نومىردەگى كولىك بار. مىنە، وسى كولىكتەردىڭ يەلەرى جول ەرەجەسىن ءجيى بۇزىپ جاتادى.

 

«ارينە، كەز كەلگەن كولىك يەسى جول ەرەجەسىن بۇزۋى مۇمكىن. ءبىراق، قازاقستاندا تىركەلگەن كولىكتىڭ يەسىنە مەكەنجايى بويىنشا ايىپپۇل كەلەدى. ال شەتەلدىك ءنومىرلى كولىكتەرگە ايىپپۇل سالىنعان كۇننىڭ وزىندە ونى كىمنەن ءوندىرىپ الۋ ماسەلەسى تۋىندايدى. وتكەن جىلدىڭ سوڭىنا دەيىن شەتەلدىك ءنومىرلى كولىكتەرگە 1 ملرد تەڭگەگە جۋىق ايىپپۇل سالىنعان ەكەن»، - دەدى ول.

 

سونىمەن قاتار الماس ارزىقۇلوۆ قازاقستان ازاماتتارى ارمەنيادان كولىك الىپ كەلگەن كەزدە زاڭبۇزۋشىلىققا باراتىندىعىن ايتادى.

 

«ارمەنيادان كولىك الۋ ءۇشىن ءسىز سول ەلدە تىركەۋدە تۇرۋىڭىز قاجەت. ال ءبىزدىڭ ازاماتتار سول جاققا بارىپ، ۋاقىتشا جالعان تىركەۋگە تۇرۋ ارقىلى كولىك الىپ كەلىپ ءجۇر. مۇنىڭ ءوزى دە زاڭبۇزۋشىلىق. سوندىقتان ونى دا توقتاۋ قاجەت. جول ەرەجەسى تۋرالى زاڭىمىزدىڭ 63 جانە 65-باپتارىندا كەز كەلگەن سىرتتان كەلەتىن شەتەلدىك اۆتوكولىك قازاقستان اۋماعىنا كىرگەننەن كەيىن 10 كۇننىڭ ىشىندە تىركەۋگە تۇرۋى كەرەكتىگى جازىلعان. ال شەتەلدەن كولىك ساتىپ العان ازاماتتاردىڭ ەشقايسىسى زاڭنىڭ بۇل بابىن ورىنداپ وتىرعان جوق. كولىك شەتەلدىك نومىردە، وزدەرى قازاقستان ازاماتتارى بولعانىمەن كولىگىن تىركەۋگە قويماعان. ال ءبىزدىڭ زاڭدا شەتەلدىڭ ازاماتى عانا قازاقستانعا كولىگىن ۋاقىتشا اكەلىپ، جۇرگىزە الاتىندىعى كورسەتىلگەن»، - دەدى عىلىمي قىزمەتكەر.

 

ونىڭ اتاپ وتۋىنشە، وسىنداي جاعدايدا قازاقستان پرەزيدەنتى شەتەلدىك ءنومىرلى كولىكپەن جۇرگەن ەل ازاماتتارىنا ۇلكەن مۇمكىندىك جاساپ وتىر.

 

«مىنە وسى داۋلى ماسەلەگە پرەزيدەنت نۇكتە قويدى دەپ ايتۋعا بولادى. اۆتوكولىك يەلەرىنە 1 جىلعا مۇمكىندىك بەرىلمەك. ياعني كەدەندىك باج بەن ۋتيليزاسيالىق سومانى بىردەن تولەي المايتىن ازاماتتارعا 1 ناۋرىزعا دەيىن قاراجات جيناپ، سودان كەيىن كولىگىن تىركەۋگە جاعداي جاسالدى. بۇل رەتتە مەملەكەت باسشىسىنىڭ حالىقتىڭ الەۋمەتتىك جاعدايىن قاپەرگە الىپ وتىرعاندىعىن ايتا كەتكەن ورىندى»، - دەدى الماس ارزىقۇلوۆ.

 

ايتا كەتەيىك، بۇگىنگى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ قازاقستاننىڭ زاڭناماسىنا ساي كەلمەيتىن شەتەلدىك كولىكتەرگە قاتىسى ماسەلەنى شەشۋدى تاپسىرعان بولاتىن.