قىتايدا كوروناۆيرۋستى جۇقتىرعاندار مەن ودان كوز جۇمعاندار سانى كۇرت ۇلعايدى. جۇڭگو بيلىگى 25 قاڭتاردا ۆيرۋستان 41 ادام كوز جۇمىپ، 29 پروۆينسيادا كەمىندە 1 287 ادام ۆيرۋستى جۇقتىرعانىن حابارلادى. قىتايلىق باق-تىڭ جازۋىنشا، ۆيرۋس جۇقتىرعانداردىڭ اراسىندا  237 ناۋقاستىڭ جاعدايى اۋىر.

سوڭعى اقپاراتقا سايكەس، حۋبەي پروۆينسياسىندا - 39 ادام، حەبەي پروۆينسياسىندا - ءبىر ادام، حەيلۋنسزياندا - ءبىر ادام كوز جۇمعان. 

25 قاڭتاردا بەلگىسىز ۆيرۋستىڭ اۆستراليا مەن فرانسياعا دا جەتكەنى حابارلاندى. ءبىراق  قىتايدان باسقا جەردە ۆيرۋستى جۇقتىرعاندار اراسىندا ادام ءولىمى بولعان جوق.

فرانسيا ءۇش ادامنان ۆيرۋس تابىلعانىن حابارلادى. بۇل ەۋروپادا تىركەلگەن العاشقى جاعداي. رەسمي تۇلعالار ەكى ناۋقاستىڭ پاريج اۋرۋحاناسىنا جاتقىزىلعانىن حابارلادى. بىرەۋى ەلدىڭ وڭتۇستىك-باتىسىنداعى بوردو قالاسىندا ەمدەلىپ جاتىر.

اقش-تا ەكى جاعداي تىركەلگەن: ءبىرى - ەلدىڭ سولتۇستىك-باتىسىنداعى سيەتل قالاسىندا، ەكىنشىسى - چيكاگو قالاسىندا. ەكى ادام دا قىتايعا ساياحاتتاپ، جاقىندا ورالعان.

اۆستراليانىڭ دەنساۋلىق ساقتاۋ سالاسى ماماندارىنىڭ ايتۋىنشا، 25 قاڭتاردا ۆيكتوريا شتاتىندا 50 جاستان اسقان جۇڭگو ازاماتىنان ۆيرۋس تابىلعان. شتاتتىڭ دەنساۋلىق ساقتاۋ ءمينيسترى دجەنني ميكاكوستىڭ ايتۋىنشا، ناۋقاس 19 قاڭتاردا قىتايدىڭ گۋانچجوۋ قالاسىنان ۇشىپ كەلگەن.

"الاڭداۋعا نەگىز جوق. پاسيەنت وڭاشا جەردە ەمدەلىپ جاتىر جانە بۇدان باسقا جاعداي تىركەلمەدى" دەدى ول.

وتكەن جىلدىڭ اياعىندا قىتايدا بەلگىسىز ۆيرۋس تاراپ جاتقانى ايتىلا باستادى. كورونوۆيرۋس دەپ اتالعان بۇل ۆيرۋس قىتايدىڭ ۋحان جانە حۋانگەن قالالارىندا كوپتەپ تارالعان. سوعان بايلانىستى جۇڭگو بيلىگى بۇل ەكى قالانى جاپتى. ازىرگە پنيەۆمونياعا ۇقساس دەرتكە شالدىقتىراتىن ۆيرۋستىڭ قايدان شىعىپ جاتقانى بەلگىسىز. 2002 جىلى وسىعان ۇقساس ۆيرۋستان جۇڭگو مەن گونكونگتە 600-دەن استام ادام ولگەن.

23 قاڭتاردا دۇنيەجۇزىلىك دەنساۋلىق ساقتاۋ ۇيىمى (ددسۇ) قىتايدا ينفەكسيانىڭ تارالۋىنا بايلانىستى دەنساۋلىق ساقتاۋ سالاسىندا توتەنشە جاعداي جاريالاۋدان باس تارتتى. ددسۇ-نىڭ باسشىسى تەدروس ادزحنوم گەبرەيەسۋستىڭ ايتۋىنشا، مۇنداي شەشىم قابىلداۋ ءۇشىن ءالى كوپ دەرەك جيناقتالۋى ءتيىس.